Instituti për Drejtësi në Kosovë ka publikuar raportin mbi luftën korrupsionin, i cili ëhstë hartuar mbi bazën e gjetjeve nga analiza rreth ndikimit të politikës në sistemin e drejtësisë, ku evidentohet se ky është problem kryesor.
Drejtori i IKD-së, Betim Musliu ka thënë se si zgjidhje më e mirë në luftën kundër korrupsionit do të ishte themelimi i një prokurorie apo gjykate të pavarur totalisht nga politika në Kosovë.
“Ne kemi ardhur në përfundim se duhet të themelohet një Gjykatë dhe një prokurori për të luftuar krimin e organizuar dhe e gjithë puna e saj do të duhej të bëhej nga Shtetet e Bashkuara të Amerikës dhe Britania e Madhe. Ky model është duke shënuar rezultate konkrete në Maqedoni”, tha ai.
Musliu theksoi se në Kosovë asnjëherë nuk ka munguar retorika për luftën kundër korrupsionit, por shtoi se nuk ka rezultate konkrete.
“Përpjekjet për luftën kundër korrupsionit përmes aktakuzave, më tepër po dëshmohen si arsyetim para publikut dhe faktorit ndërkombëtar se korrupsioni në Kosovë po luftohet, ndërsa IKD ka gjetur se në shumë raste të profilit të lartë, prokuroria ka ngritur aktakuza, të cilat janë refuzuar nga gjykata, në raste të caktuara që në seancën e shqyrtimit të parë.
Nuk ka rezultate konkrete mbi pasuritë e pajustifikuara të politikanëve. Sistemi i drejtësisë është i ndikuar, është i kapur, sepse asnjë nga pozitat e larta nuk mund të zgjidhet pa pasur ndikim të politikës. Fatkeqësisht edhe Policia rezulton të udhëheqë vet prokurorinë, pasi ajo nuk mund të marrë vendime ndryshe”, tha ai, duke shtuar se besueshmëria e qytetarëve ndaj institucioneve është vetëm 15 për qind. /tesheshi.com/
