Kërcënimet e shfaqura nga Serbia me luftë ditëve të fundit kanë bërë që në Kosovë të kërkohet krijimi i xhandarmërisë si kundërpërgjigjje, në kohën kur transformimi i Forcave të Sigurisë në ushtri nuk po ndodh për shkak të Listës Serbe.
Një propozim të tillë e kanë bërë kryeredaktori i të përditshmes “Koha Ditore”, Agron Bajrami dhe drejtori i Institutit “Riinvest”, Lumir Abdixhiku, në një vështrim të përbashkët, të botuar sot në këtë gazetë.
Duke dalë në përfundimin se pas incidenteve të fundit, sidomos me “trenin serb” dhe deklaratave luftënxitëse nga Beogradi, situata mes palëve është e tensionuar dhe e rrezikshme, Bajrami dhe Abdixhiku shkruajnë se “në rrethana si këto, është e qartë se institucionet e Kosovës do të duhej të dilnin me një vlerësim të ri për kërcënimet që e rrezikojnë Kosovën” dhe se “ato, para së gjithash, duhet të ndërmarrin veprime e vendime që kanë për qëllim përmirësimin e kapaciteteve të shtetit për përballje me kërcënime si këto”.
“Kosova, në fund të ditës, nuk guxon të ushtrojë rolin e vet vetëm si spektator që pret fatin e vet varësisht nga disponimet e një fqinji kërcënues”, shkruajnë ata, duke propozuar krijimin e xhandarmërisë, si një zgjidhje e shpejtë dhe efektive, në mungesë të një ushtrie të Kosovës. /tesheshi.com/
