Numri i madh i qenve endacakë nëpër qytete të Kosovës dhe frika se mund të marrin ndonjë jetë, ka bërë që Asociacioni i Komunave të Kosovës (AKK) të kërkojë ndihmë nga qeveria, gjë që ditë më parë e bëri edhe Shpend Ahmeti, kreu i Prishtinës.
AKK-ja i ka drejtuar një letër zyrtare Ministrisë së Financave me kërkesën për mbështetje financiare për menaxhimin dhe kontrollin e qenve endacakë, e cila kap koston prej një milionë eurosh , shkruan gazeta “Koha Ditore”.
Në letrën zyrtare, e cila i është adresuar ministrit të Financave, Avdullah Hoti, nga Asociacioni i Komunave, thuhet se “qeveria duhet të mbështesë komunat në minimizimin, apo eliminimin e problemit me qentë endacakë, pasi që Republika e Kosovës nuk ka ndonjë program efektiv gjithëpërfshirës për të menaxhuar dhe kontrolluar popullacionin në rritje të qenve endacakë”.
Ndryshe, sipas organizatës joqeveritare “Strehimorja për Qen dhe Mace të Kosovës se Jugut” (SQMKJ), në Kosovë janë afër 50,000 deri 70,000 qenë endacakë. /tesheshi.com/
