Qytetarët e Kosovës e shikojnë me dyshim sistemin e drejtësisë dhe rolin e organeve kompetente, që janë në funksion të këtij drejtimi. Lajmi u bë publik gjatë konferencës së gjashtë vjetore të Këshillit Gjyqësor të Kosovës.
Të pranishmit u ngritën shqetësimin se ndryshimi i shpeshtë i ligjeve po ndikon në pasigurinë e gjyqtarëve dhe prokurorëve dhe se besimi tek drejtësia është ulur ndjeshëm.
Konferencën e hapi kryesuesi i Këshillit Gjyqësor të Kosovës, Nehat Idrizi, i cili tha se vlerësimi i performancës së gjyqtarëve dhe kryetarëve të gjykatësve do të sigurohet të jetë efikas dhe transparent.
Fejzullah Hasani, kryetar i Gjykatës Supreme të Kosovës, tha se sondazhet vazhdimisht tregojnë ulje të besueshmërisë së qytetarëve në drejtësi, ndaj theksoi se kjo është shqetësuese për të gjithë dhe se duhet vendosmëri dhe përkushtim për fuqizimin e paanshmërisë dhe profesionalizmit.
Ndërsa, Blerim Isufaj, kryesues i Këshillit Prokurorial të Kosovës, tregoi se ndryshimi i shpeshtë i ligjeve po ndikon në pasigurinë e gjyqtarëve dhe prokurorëve në zbatimin e ligjit. Ai përmendi edhe se drejtësia në Kosovë është përballur edhe me mungesë të prokurorëve, ku edhe si rezultat është rritur numri i lëndëve të vjetra.
Kurse, Aleksandër Lumezi, kryeprokuror i Prokurorisë së Shtetit, tha se sistemi gjyqësor ka vërejtje të mëdha nga qytetarët e Republikës së Kosovës, ndaj edhe faktori ndërkombëtar pohon se gjyqësori nuk është i pavarur dhe kërkon lirimin e ndikimeve politike.
Gjatë këtij viti konferenca e gjashtë mbahet në mënyrë që të shkëmbehen përvoja mes gjyqtarëve dhe prokurorëve, si dhe të ketë më shumë mundësi në zgjidhjen e rasteve të ndryshme gjyqësore./tesheshi.com/
