Me pankrata në duar “Qeveri boll mo! Zbato ligjet”, “Për shoqëri të lirë dhe të barabartë”, “Stop presionit ndaj punëtorëve”, nën organizimin e Bashkimit të Sindikatave të Pavarura të Kosovës (BSKP), punëtorët kanë protestuar tek ndërtesa e qeverisë të martën duke kërkuar kushte më të mira pune.
Me këtë rast kryetar i BSPK-së, Avni Ajdini tha se paga minimale 250 euro është e drejtë elementare, duke kërkuar edhe për respektimin e orarit e sigurime shëndetësore, ndërsa paralajmëroi se do të merren masa nëse qeveria nuk respekton kërkesat e tyre.
“Kjo ditë është arritur me gjak kur punëtorët kanë kërkuar të drejtat e veta. Punëtorët kanë luftuar duke i thënë stop skllavërimit ne sot i themi boll qeverisë. Ne jemi sot unik. Mesazhi është që të zbatohet ligji, të ngritët paga minimale në 250, të njihet përvoja e punës për vitet e 90-ta. Paguheni për 8 orë e punoni 12 orë. Nëse nuk i kërkojmë të drejtat tona nuk do të realizohen. Nuk ka askund në botë që 75 euro merret një pension. Kjo vjen për arsye që nuk kemi kërkuar të drejtat tona. Kjo nuk do të jetë protesta e vetme. Nëse nuk realizohen kërkesat tona nuk do ta presim 1 majin për protesta më masive. Punëtorët e KEK-ut punojnë në kushte mizore dhe askush nuk përgjigjet”, tha ai.
Ndërsa Shukrie Regjepi nga rrjeti i gruas në BSPK tha se duhet të njihen edhe të drejtat e grave.
“Ne si gra kërkojmë barazi reale gjinore që do të thotë përfaqësim 50-50, paga të barabarta, kërkojmë barazi, kërkojmë që edhe grat të vendosen në pozita vendimmarrëse, kërkojmë që të ndalohen ngacmimet seksuale në vendin e punës”, tha ajo. /tesheshi.com/
