Dita e djeshme ka qenë mjaft e ngarkuar në Kosovë, me më shumë se 100 aksidente, dy prej tyre me humbje jete. Fluksi i madh i qarkullimit, pjesërisht për shkak të ardhjes së diasporës, ka bërë që rrugët të bëhen gjithnjë e më të pamundshme për qarkullim.
Pakujdesia e ngasësve është gjobitur me afro 1200 tiketa, dhe me 21 arrestime. Mëngjesi i djeshëm nisi me humbje jete në Merdare, ndërsa edhe pasditja qe e tillë në Obiliq.
Edhe numri i të lënduarve ishte mjaft i madh, gjithsej 31, sipas raporteve të policisë. Ekspertët e komunikacionit bëjnë thirrje për funksionalizimin e task-forcës policore kundër shpejtësisë në trafik si dhe vënien e gjobave më të rënda për shkelësit e rregullave.
Kujtojmë se në Kosovë dënimet fillojnë nga 20 euro te më së shumti 300 euro, shumë kjo pothuajse e pazbatueshme për shkelësit e rregullave.
Ndërsa në perëndim, gjobat e shpejtësisë sillen nga 150 euro deri në 600 euro, dhe në shtetet si Franca, Zvicra dhe Spanja, tejkalimi i shpejtësisë përcillet edhe me burgim. /tesheshi.com/
