Importi i mallrave serbe në Kosovë është rritur vitin e kaluar. Bazuar në të dhënat zyrtare të Doganave të Kosovës, vitin që lamë pas në Kosovë janë importuar mallra të produkteve serbe në vlerë prej 372 milionë euro, ndërsa përmes rrugëve ilegale shifrat jozyrtare përllogariten të sillen nga 100 deri në 200 milionë euro, me çka e importi rritet në afër 600 milionë euro.
Kurse, eksporti i produkteve të Kosovës në Serbi gjatë vitit 2015 ishte 27 milionë euro. Zëdhënësi i Doganës, Adriatik Stavileci tha për KosovaPress se gjatë vitit 2015, ka pas rritje të importit për 4 për qind më shumë se në vitin 2014.
“Viti 2015 ka pasur një rritje të importeve të produkteve të Serbisë me 4 për qind më shumë se periudha paraprake e vitit 2014-të. Importi i mallrave serbe në Kosovë ka arrit në vlerën prej 372 milionë euro gjatë vitit 2015. Ndërsa, eksporti i produkteve të Kosovës, nëse e krahasojmë me vitin 2014, në vitin 2015, ka rritje, po sidoqoftë është në vlera nominale. Në 2014, kemi pasur 23 milionë euro eksport, ndërsa, në vitin 2015, kemi pasur 27 milionë euro, eksport të produkteve tona drejt Serbisë”, tha Stavileci.
Ai po ashtu tha se për dy muajt e parë të këtij viti, nga Serbia janë importuar mallra në vlerë prej 45 milionë euro. Kurse, Kosova për këta dy muaj eksportoi në Serbi mallra në vlerë 2.5 milionë euro. /tesheshi.com/
