Nga Blendi Gashi
Kryeministri Ramush Haradinaj i cili aktualisht është pa rrugëdalje për çështjen e Demarkacionit me Malin e Zi, poashtu çfarë do bëhet me Asocaiconin e kur do formohet ushtria, premtime që i dha gjatë fushatë se do i zgjidh brenda 90 ditësh në krye të qeverisë, tashmë ka dalë me një synim të ri, me ç’rast ka thënë se qeveria e tij synon në vitin 2019 të marrë statusin e vendit kandidatë për anëtarësim në Bashkimin Evropian.
Dhe për të ndodhur një gjë e tillë në mbledhjen e qeverisë të mbajtur të premten Haradinaj ka kërkuar nga ministrat e tij të kryejnë detyrat dhe të zbatohet me përpikëri Marrëveshja e Stabilizim Asocimit (MSA), marrëveshje e cila do të drejtojë Kosovën në procesin e integrimeve evropiane.
“Ne kemi identifikuar prioritetet kyçe për vitin 2018. Prioritet kyç është agjenda evropiane e Kosovës dhe synimi ynë është që Kosova sa më shpejt me marr statusin vendit e kandidatit. Ajo që kemi bërë së bashku me ministrat dhe ministren Hoxha keni ardhur deri te një dakordim që në takimin që është me këshillin raportues të MSA jo vetëm të shkojmë me një raport, por të shkojmë me një raport që na mundëson që ta marrim statusin e kandidatit në vitin 2019. Qëllimi është që të dëshmojmë që i kemi marrë punët seriozisht sidomos në integrimet evropiane dhe të mos na japin veç detyra por që të marrim vet përgjegjësit tona”, ka thënë Haradinaj.
Për marrjen e statusit kandidat ka folur edhe zv. kryeministri Enver Hoxhaj, i cili për dallim nga shefi i tij Haradinaj ka një dyshim se aplikimi për statusin e vendit kandidatë mund të mos ketë përkrahjen e partnerëve të Kosovës.
Megjithatë Hoxhaj thotë se qeveria nuk do të ndal përpjekjet që më 2019 të marrë statusin e kandidatit.
Ky synim i qeverisë Haradinaj vije vetëm pak kohë pasi qeveria e tij mori dy goditje që në start të mandatit, pasi u tërhoq nga aplikimi për anëtarësim në UNESCO dhe Interpol, për çka mori jo pak kritika nga opozita dhe jo vetëm.
Andja duke parë këto dy dështime dhe detyrat që ka para vetës Haradinaj sidomos në luftën anti-korrupsion shtrohet pyetja se sa mund të realizohet ky synim i kryeministrit?
Ja ç’thonë analistët…
Analistët politikë shprehen skeptik sa i përket marrjes së statusit kandidat për BE më 2019 pasi thonë se qeveria “Haradinaj” ka shumë detyra para vetës, pra duhet të adresojë reformat kryesore që rrjedhin prej MSA-së, e shumë prej këtyre reformave kërkojnë ndryshime të thella sidomos në fushën e sundimit të ligjit dhe luftës ndaj korrupsionit.
Politologu Mentor Tahiri nuk pret që ambicia e Haradinajt të ketë sukses pas dy vitesh pasi thotë se duhen plotësohen një sërë kriteresh për të marrë statusin e kandidatit për në BE.
“Bazuar në dinamikën aktuale të punës së legjislacionit në Kosovë nuk është e pritshme që vendi të ketë statutin e kandidatit për në BE. Natyrisht se kjo mund të jetë një ambicie dhe Kosova që tani konsiderohet si një nga kandidatët poteencial por para vetës ka një rrugëtim më të gjatë kurse dinamika e tanishme po tregon të kundërtën. Një kandidat potencial duhet të përshkojë rrugën e të ashtuquajturës set të kritereve të Kophenhages”, thotë Tahiri për tesheshi.com.
Njohësi i rrethanave politike, Leon Duhanaj ambicien e qeverisë “Haradinaj” e sheh si fontanë dëshirash. Ai thotë se duhet vlerësuar qëllimi i mirë i kryeminsitrit por vendin e pret rrugë e gjatë për t’u anëtarësuar në BE.
“Kosova duhet të ecë hap pas hapi, t’i kryej punët me rend dhe pastaj integrimi vjen vetë. Duhet së pari të përfundohet çështja e Demarkacionit. Duhet të ndodhë reforma në administratëm reforma në drejtësi, përkatësisht të ketë zbatim të ligjshmërisë, të ketë luftë të pakompromis kundër krimit, korrupsionit, nepotizmit. Vetëm kështu ecet drejt integrimit”, thotë Duhanaj për tesheshi.com.
