Qeveria e Kosovës do ta provojë sërish pas dështimit të parë, pranimin e vendit në
Agjencinë për Kulturë, Shkencë dhe Arsim të Kombeve të Bashkuara (UNESCO).
Zv/sministri i Punëve të Jashtme i Kosovës, Valon Murtezaj, tha për Radon Evropa e Lirë, se po përgatiten letrat e betejës së dytë.
“Institucionet e Republikës së Kosovës, Ministria e Jashtme, por edhe ministritë tjera që ndërlidhen me fushat që UNESCO i mbulon, janë duke bërë përparime në kuptimin e hartimit të dokumenteve shtesë qoftë legjislative apo strategjike, në mënyrë që të adresojë çështjet që lidhen me fushën e veprimtarisë të UNECO-s. Do të thotë, siç janë: kultura, trashëgimia kulturore, aspektet e edukimit, të komunikimit në përgjithësi, të diversitetit etj. Pra, në këtë kuptim, Qeveria e Republikës së Kosovës është duke punuar”, tha Murtezaj.
Kandidimi i Kosovës për UNESCO, vitin e kaluar, u kundërshtu mjaft fuqishëm nga Serbia, me pretendimin se Kosova dëshiron ta tjetërsojë dhe përvetësojë trashëgiminë kulturore dhe historike serbe në Kosovë. Në këtë pikë, kundërshtime kishte bërë edhe Kisha Ortodokse Serbe.
Përfaqësuesi i Kishës Ortodokse Serbe në Kosovë, igumeni Sava Janjiq, nuk dëshiron të flasë pasi sipas tij, kjo kishë ende nuk e ka diskutuar këtë çështje për të nxjerrë qëndrimin e saj në opinion.
Më 9 nëntor të vitit 2015, Konferenca e Përgjithshme e UNESCO, nuk votoi në favor të pranimit të Kosovës në këtë organizatë. Kosova nuk arriti të sigurojë votat e më shumë se dy të tretave të vendeve anëtare të kësaj organizate, të cilat ishin të nevojshme për pranimin e saj në UNESCO.
/tesheshi.com/
