Nga Blendi Gashi
Kosova, edhe pse është një ndër shtetet më të reja të Evropës, njëkohësisht edhe më i varfëri, ka aq shumë motele (bujtina) e objekte të tjera hoteliere, saqë të krijohet përshtypja se askush nuk fle e nuk jeton në shtëpitë e veta.
Në qytete të mëdha apo në qyteza të vogla, numri i moteleve që nga përfundimi i luftës është rritur në shkallë enorme.
Çdokush që kalon pranë rrugëve kryesore të vendit, magjistraleve, por edhe brenda qytezave të vogla, mund të vërejë shumë lehtë disa objekte të tilla. Por, ajo që bie në sy është se nuk ka numër të madh veturave të parkuara pranë këtyre objekteve që tregojnë se numri i personave që shkojnë për të qëndruar një natë apo edhe për pak orë është i vogël.
Pronarë dhe punëtorë të moteleve thonë se interesimi për të marrë dhoma ka rënë ndjeshëm nëse krahasohet me kohën e pasluftës, duke thënë se punë më shumë ka vetëm gjatë tre muajve sa qëndrojnë mërgimtarët në Kosovë.
Ata nuk pranojnë të deklarohen me emra as të përmendet emri i moteleve të tyre, por thonë se hapja e numrit të madh të moteleve ka bërë të mos ketë interesim aq të madh.
Ministria e Tregtisë dhe Industrisë, konkretisht Divizioni i Turizmit, thotë se nuk ka kategori të veçantë për motelet, andaj nuk ka shifra të sakta sa është numri i tyre. 
Divizioni i turizmit në MTI në përgjigjen dhënë për portalin ‘Te Sheshi’, se në bazë të kodit – për klasifikimin e veprimtarive ekonomike, NACE, të dhënat e marra nga Agjencioni i Regjistrimit të Bizneseve të Kosovës (ARBK), rezulton që nuk ka kategori të veçantë për motelet, por ekziston shifra e veprimtarisë 5510, që përfshinë këto kategoritë si: hotelet, – hotelet e vende turistike, hotelet me apartamente/suita, motelet.
Zëdhënësi i MTI-së Bajram Shala në përgjigjen dërguar për portalin tone, thotë se numri i përgjithshëm i kësaj kategorie është 850 (Hotele dhe akomodim te ngjashëm)
“Në këtë vit, deri më 30 qershor 2015, janë regjistruar 25 veprimtari me shifrën 5510, në vitin 2014 janë regjistruar 51 veprimtari me shifrën 5510, dhe në vitin 2013 janë regjistruar 44 veprimtari me shifrën 5510”, thuhet në përgjigjen e MTI-së për ‘Te Sheshi’. Sipas MTI-së, kryeqyteti i Kosovës, Prishtinal prinë me 129 veprimtari me shifrën 5510, kurse i dyti renditet Prizreni me 74 veprimtari.
Në raportin e Agjencisë së Statistikave të Kosovës (ASK), për statistikat e hotelerisë në Kosovë për tre mujorin e katërt të vitit 2014-të thuhet se numri më i madh i vizitorëve në hotele është në Prishtinë, deri sa keq nuk kanë mbetur as Peja e Prizreni. Në këto statistika të ASK-së nuk është përfshirë Lipjani, i cili tradicionalisht ka pasur vizitorë të shumtë nëpër hotele, sidomos për “pushime” ditore.
Zyrtarët e ASK-së kanë treguar se në Kosovë janë 105 hotele, që ushtrojnë veprimtari hoteliere në territorin e Kosovës, pjesa më e madhe e tyre gjendet në rajonin e Prishtinës, Pejës, Ferizajt, etj.
“Numri i vizitorëve në vitin 2014 është rritur për 2.42%, në raport me vitin 2013, kurse netëqëndrimet e vizitorëve vendorë janë rritur për 0.74%. Rritje ka t0e vizitorët e jashtëm për 22.44%, kurse netëqëndrimet e vizitorëve të jashtëm janë rritur për 21.68%, në raport me vitin 2013. Në TM4 2014 numri i vizitorëve është 24 664, prej tyre 40.98% janë vizitorë vendorë dhe 59.02 % janë vizitorë të jashtëm. Kurse, numri i bujtjeve në TM4 2014 është 38 276, prej tyre 35.42% janë nga vendorët dhe 64.58 % janë nga të huajt. Me numrin më të madh të vizitorëve, gjatë vitit 2014, prin kryeqyteti i Kosovës, Prishtina, me gjithsej 77 167 vizitorë, patasj Peja radhitet e dyta me 11 534 vizitorë, dhe Prizreni radhitet i treti me 8 615 vizitorë. Në TM4 2014, numrin më të madh të vizitorëve dhe netëqëndrimet e tyre e ka rajoni i Prishtinës me 17 260 vizitorë dhe 26 667 netëqëndrime. Numri më i madh i vizitorëve të huaj përqëndrohet në rajonin e Prishtinës, Pejës etj. Kurse, sa u përket shteteve se prej nga vijnë, numri më i madh i tyre është nga Shqipëria, SHBA-ja dhe Gjermania”, thuhet në raportin e fundit të ASK-së.
Pronar dhe punëtorë të disa moteleve të kontaktuar nga portal ‘Te Sheshi’, kaë pranuar të flasin për veprimtarinë e tyre vetëm në kushte anonimiteti, lidhur me interesimin e qytetarëve për të qëndruar në bujtinat e tyre.
Një pronar i një prej moteleve të Prishtinës i cili nuk ka pranuar të identifikohet, ka treguar për portalin tonë se numri i vizitorëve që shkojnë për bujtje nuk është edhe aq i kënaqshëm. Por,ai ka deklaruar se statistikat qëndrojnë në nivel të njëjtë me muajin e kaluar dhe nuk mund të thotë se vjet apo këtë vit deri më tani ka pasur më shumë apo më pak vizitorë.
“Mundem me thënë se ka qenë niveli i njëjtë i vizitorëve. Nuk jemi aq të kënaqur, por prap mirë, por kuptohet në krahasim me vitet e pasluftës numri është më i vogë pasi edhe konkurenca është më e madhe. Janë hapur shumë motele në çdo cep të vendit, dhe kjo gjë e bën të veten edhe sa i përket numrit të vizitorëve”, ka deklaruar ky pronar.
Një punëtor i një moteli që gjendet në rrugën transit Milloshevë-Podujevë, i cili nuk ka pranuar të tregon emrin, ka thënë se numri i vizitorëve është i kënaqshëm vetëm gjatë tre muajve kur vijnë mërgimtarët (qershor, korrik, gusht) dhe më pas bie ndjeshëm interesimi.
“Nuk kemi statistika të sakta por në sezonin e verës rritet numri i personave që janë të interesuar për të marrë dhoma, qoftë për një natë apo veç për disa orë pushimi. Nga muaji shtator interesimi është shumë më i vogël. Shumë motele janë hapur në të gjithë Kosovën dhe ndoshta edhe konkurenca e madhe ndikon që të mos ketë shumë punë si pasluftës, pasi ka pasur shumë pak. motele”, ka deklaruar punëtori i hotelit /tesheshi.com/
