Komiteti Ekzekutiv i UNESCO-s merr në shqyrtim kërkesën e Kosovës për anëtarësim në organizatën e OKB-së në fushën e arsimit, shkencës dhe trashëgimisë kulturore.
Vendimi që pritet të merret nga komiteti, është vetëm një fazë në rrugën e pranimit të vendit në organizatë, por gjithsesi, për të kaluar hapin e radhës, Kosovës i duhen votat e 29 anëtarëve, nga 50 që janë gjithsej.
Nëse merret një vendim pozitiv, që pritet nga qeveria në Prishtinë, vijon hapi më vështirë, ai i shqyrtimit të aplikimit në konferencën e përgjithshme, që mbahet në muajin nëntor.
Por, në këtë fazë Kosovës i duhen dy të tretat e votave të trupës prej 195 vendesh.
Prej disa muajsh tashmë, Kosova është përballur me një reagim të ashpër dhe një lobim të fuqishëm të Serbisë e cila po përpiqet ta pengojë shtetin të anëtarësohet në UNESCO. Edhe zyrtarët e Kosovës e kanë përdorur këtë kohë për të mbledhur mbështetje për votimin e sotëm dhe të ardhshëm, në mënyrë që edhe Kosova të jetë pjesë e komunitetit ndërkombëtar në projektet që ofron UNESCO. /tesheshi.com/
