Ministrja e Punëve të Jashtme të Kosovës, Donika Gervalla-Schwarz, beson se njohja e plotë ndërkombëtare e realitetit të pavarësisë së Kosovës do të ishte një sinjal për nacionalistët në Serbi se destabilizimi i fqinjëve si Bosnja, Mali i Zi dhe Maqedonia e Veriut nuk është një recetë për sukses.
“Njohja e Kosovës do të ishte një kontribut i madh, madje historik për stabilitetin dhe paqen”, tha Gervalla-Schwarz, kreu i diplomacisë së Kosovës, në një intervistë për Fena-n kroate.
Kosova është ndryshe nga Bosnja, siç tha ajo, “edhe pse ne kemi të njëjtat forca që po përpiqen të na fusin në telashe”. Megjithatë, Kosova nuk është e ndarë në strukturën qeveritare: “Më shumë se 94 për qind e qytetarëve tanë i përkasin një kombësie, dhe Kushtetuta jonë është më e mira për pakicat në Evropë. Ne madje kemi anëtarësim të garantuar në qeveri për pakicat”.
Qeveria e Kosovës, sipas saj, është mjaft kontrolluese dhe e aftë për të garantuar sigurinë dhe sundimin e ligjit, edhe në pjesën veriore, edhe ndaj strukturave të dhunshme kriminale që tentojnë të frikësojnë qytetarët serbë, shqiptarë, boshnjakë dhe të tjerë të Kosovës që jetojnë në atë pjesë të vendit.
“Kjo është një pyetje e vërtetë, jo vetëm për Kosovën, por edhe për Bosnjën, Malin e Zi dhe Maqedoninë e Veriut, dhe në lidhje me këtë edhe për Perëndimin: sa jemi të gatshëm dhe për sa kohë të tolerojmë një Rusi gjithnjë e më agresive me ndërmjetës në Ballkan, nga Vuçiç dhe Daçiç e deri te Dodik?”, thotë Gervalla-Schëarz.
Perëndimi duhet të ndalojë së shituri iluzionet
Perëndimi duhet të përgjigjet, thekson ajo, dhe nuk duhet të dështojë përsëri, siç bëri në mënyrë dramatike në vitet 1990 në rajon, dhe pas 1999 në lidhje me agresionin e Putinit kundër Gjeorgjisë në 2008, Krimesë në 2014, e cila përfundimisht çoi në luftë totale kundër Ukrainës në 2022.
“Nëse ne si Perëndim dështojmë përsëri, Evropa mund të përfundojë përsëri në një luftë të madhe. Ose do të ndalojmë ata që bëjnë luftë dhe ata që kërcënojnë me luftë, si Putin, Vuçiç, Daçiç, Vulin dhe ekstremistët e tjerë, ose do të jetë shumë vonë”, paralajmëron gruaja që drejton diplomacinë e Prishtinës.
Sipas saj, situata në Kosovë është sa më stabile, sepse qeveria dhe populli qëndrojnë të qetë dhe nuk reagojnë njësoj si nacionalistët urrejtës që tentojnë të provokojnë konflikte.
Duke folur për normalizimin e marrëdhënieve me Serbinë dhe Kosovën, Gervalla-Schwarz theksoi se ata janë të gatshëm të pranojnë propozimin franko-gjerman si bazë për bisedime të mëtejshme, por “ne nuk do lejojmë një Republika Srpska tjetër”, thënë këtë duke cilësuar të tillë krahasimisht Asocacionin.
Ajo kujtoi se “bashkësia e komunave serbe” bie ndesh me nenin 23 të Kushtetutës së Kosovës: “Në vend të kësaj, ne fokusohemi në marrëveshjen përfundimtare që duhet të rezultojë, siç i thanë presidenti Biden dhe kancelari Scholz z. Vuçiç, në njohje reciproke”.
E pyetur se cili është pozicioni aktual ndërkombëtar i Kosovës, veçanërisht nga aspekti i vazhdimit të fushatës së Serbisë për tërheqjen e njohjes së Kosovës si shtet, hyrjen në Kombet e Bashkuara, Gervalla-Schwarz tha se “të gjithë e dinë atë lloj propagande nga Beogradi, por sa i përket OKB-së, ne e dimë se anëtarësimi i Kosovës nuk varet vetëm nga Serbia”.
“Ka të tjerë, në mesin e anëtarëve të përhershëm të Këshillit të Sigurimit të OKB-së, të cilët nuk duan të krijojnë një precedent të tillë. Kjo tregon se premtimet për anëtarësim në OKB janë thjesht joserioze. Ata janë naivë në rastin më të mirë. Perëndimi duhet të ndalojë së shituri iluzione dhe duhet të zhvillojë një strategji realiste, por jo duke vënë baste për Vuçicin dhe Putinin, por duke iu përshtatur shpejt epokës së re”, thekson Gervalla-Schwarz.
Perëndimi, pjesë e të cilit sigurisht është edhe Kosova, thekson ajo, duhet të ndajë politikën e vet nga Serbia dhe Rusia: “Ne duhet të lëvizim para në vend që të ngecim prapa. Prandaj, së pari duhet njohje nga anëtarët e mbetur të BE-së dhe NATO-s dhe më pas një sinjal për Rusinë: ‘Këtu nuk ka mbetur asgjë për të rrëmbyer, ka mbaruar’ Sapo Greqia ose Spanja ose ndonjë nga pesë vendet e mbetura nga 27 anëtarët e BE-së ta njohin Kosovën, ajo do dalë nga ngërçi dhe do ta detyrojë Serbinë të rillogarisë pozicionin e saj”.
Njohja e realitetit të pavarësisë së Kosovës, pretendon ajo, do të dërgonte një sinjal për nacionalistët në Serbi se destabilizimi i fqinjëve si Bosnja, Mali i Zi dhe Maqedonia e Veriut nuk është një recetë për sukses. /tesheshi.com/
