Nga Blendi Gashi
Kosova po ecën drejt muajit të dhjetë të krizës politike si pasojë e kundërshtimeve mes qeverisë “Mustafa” dhe partive opozitare për Asociacionin e komunave me shumicë serbe dhe Demarkacionin me Malin e Zi.
Siç duket një gjendje e tillë do të vazhdojë deri në momentin kur partitë politike kosovare pajtohen që të shpërbëjnë parlamentin dhe t’i hapin rrugë zgjedhjeve të reja.
Tri partitë opozitare, Vetëvendosje, AAK e NISMA edhe pse më nuk janë unike kundër qeverisë kanë paralajmëruar se do kundërshtojnë fuqishëm ratifikimin e marrëveshjes për Demarkacionin kurdo që vihet si pikë e rendit në ditë në parlament, duke paralajmëruar edhe rikthimin e gazit lotsjellës.
Padyshim se ky është një sinjal i qartë se Kosova po hynë sërish drejt një krize të thellë politike me përmasa të rrezikshme të tenisionimit të situatës së sigurisë në vend.
Një prej opozitarëve të parë që ka paralajmëruar tensionim të situatës është Bilall Sherifi nga NISMA, i cili në një deklaratë dhënë ditë më parë për media ka thënë se ratifikimi i kësaj marrëveshje do ta thellonte krizën politike në përmasa të një krize të sigurisë në vend.
“Do të bënin gabim të rëndë, sepse konsideroj që ratifikimi i kësaj marrëveshje krizën politike do ta thellonte në përmasa të një krize të sigurisë së vendit. Cilat do të jenë mënyrat e kundërshtimit do t’i bëjmë publike në kohën e duhur”, ka thënë Sherifi.
S’ka rehati pa u eleminuar gabimet
Se nuk do të ketë rehati në vend në muajt në vazhdim, e thonë edhe opozitarë të tjerë, analist politik e ekspert të sigurisë.
Anëtari i Kryesisë së AAK-së, Smajl Latifi, nga AAK thotë se Demarkacioni është bërë keq dhe sipas tij qeverua nuk ka asnjë arsye të barrikadohet kaq brutalisht e ta justifikojë gabimin e rëndë që e ka bërë komisioni qeveritar (Murat Meha) dhe më pas, Hashim Thaçi (ish-ministër i jashtëm).
“Kjo qasje nuk është rrugë e zgjidhjes. Përkundrazi. Kosova nuk ka tokë për të humbur dhe as për të falur. Kërkohet një marrëveshje e re, pa gabime, e më pas ajo të ratifikohet në kuvendin e Kosovës. Kjo është çështje tepër serioze e Kosovës. Qeveria antikushtetuese e drejtuar nga Isa Mustafa, i mbetet të heq dorë përfundimisht nga përpjekja për ta dërguar versionin aktual/projektligjin për ratifikim në kuvend. Nuk mund të tolerohen edhe më tej veprime anti-Kosovë nga një qeveri antikushtetuese dhe pa legjitimitet”, thotë Latifi, për tesheshi.com.
Sipas tij, kuvendi më mirë është të shpërbëhet dhe vendi të shkojë në zgjedhje të reja të parakohshme.
“Deputetët nuk besoj se kanë gatishmëri që t’i thonë ‘PO’ ratifikimit të marrëveshjes aktuale e cila përmban versionin ku Kosova ia jep mbi 8000 hektarë tokë Malit të Zi. Mendoj se deputetët janë aq të vetëdijshëm dhe nuk do t’ia lejojnë vetes të marrin si ‘margaritarë’, damkën e tradhtisë. Përndryshe, një gjë dihet: qytetarët e Kosovës janë kundër coptimit të Kosovës. Nuk besoj se ata do të rrinë duarkryq e të bëjnë sehir, nëse para syve të tyre dhe kundër vullnetit të tyre, dikush merr mundimin dhe guximin që t’ia falë Malit të Zi, tokat e shtetit të Kosovës. Prandaj, nxitimi për ta çuar në Kuvend është mesazh dhe ftesë për reagim të fuqishëm. Përgjegjësinë për ta shmangur të keqen e kanë në dorë protagonistët dhe shkaktarët e kësaj gjendjeje qeveria ‘Mustafa’ dhe Hashim Thaçi”, thotë Latifi, për tesheshi.com.
Anëtari i AAK-së shton se mundësitë janë të hapura për të eliminuar këto gabime trashanike, në mënyrë që të rivendoset drejtësia në këtë proces.
Sipas tij, Qafa e Çakorrit dhe Kulla e Zhlepit janë pikënisja e përmbylljes me sukses të demarkacionit Kosovë-Mal i Zi.
Ndërsa, analisti politik, Fadil Lepaja, thotë se koalicion qeveritar është përgjegjës për arrogancën e treguar lidhur me bisedimet, të cilat sollen deri te dy marreveshjet, me Serbinë dhe me Malin e Zi.
“Tash jemi në një fazë tjetër, kur pozita, posaqërisht e ka lëshuar, e ka djegur rastin të zhvilloj bisedime të brendshme, efektive, dhe kështu e ka vendosur jo vetem opozitën por edhe tërë vendin në një situatë të aktit tashmë të kryer, dhe madje qytetarët e sidomos opozita vazhdojne të provokohen sidomos nga Presidenti me deklarata se ky proces është kryer plotësisht dhe se nuk ka çka bisedohet më sidomos për demarkacionin me Malin e Zi”, thotë Lepaja, për tesheshi.com.
Edhe eksperti i sigurisë, Burim Ramdani, njëherit ish deputet alarmon se situata mund të përkeqësohet nëse nuk gjendet një gjuhë e përbashkët mes partive politike në vend lidhur me shenjëzimin e kufitit me Malin e Zi.
Ramadani thotë se kriza politika e deritashme mund të marrë përmasa shtesë nëse vazhdohet me të njëjtën logjikë politike që ka shkaktuar krizën.
“Skena politike do të duhej të gjente mënyrën për të tejkaluar së bashku çështjen e demarkacionit. Nuk mund të parashikoj skenare të sigurisë, por besoj se Demarkacioni është çështje shumë më thjesht e zgjidhshme sesa që është bërë deri më tash”, thotë Ramadani, për tesheshi.com.
Ndryshe, opozita kërkon që mazhoranca e tanishme politike ta pranojë se kanë bërë gabim dhe ta shpallë marrëveshjen për Demarkacionin të pavlefshme në mënyrë që të hapet rruga dhe të fillohet një proces i ri për një marrëveshje të re. /tesheshil.com/
