Ish-ministri i Jashtëm Ditmir Bushati është kundër qasjes së qeverisjes së Tiranë, më saktë Ramës, ndaj Serbisë, pa e parë atë me syrin e Kosovës por zgjedhur ta shohë me syrin euroatlantik.
“Politika jonë e jashtme është orientuar mes Italisë dhe Greqisë për të dëshmuar përkatësinë tonë europiane dhe mesdhetare. Serbinë duhet ta shohim përmes syve të Kosovës. Kjo nuk do të thotë se me Serbinë nuk duhet të kultivojmë një marrëdhënie nomale, por mbase as pas 50 apo 100 vitesh ne nuk do të jemi dot miq me Serbinë. Çdo lloj rruge normaliteti dhe miqësie duhet të kalojë përmes Kosovës,” tha zoti Bushati gjatë një interviste me gazetaren Elona Meço në RTSH.
Siç argumentoi ish-kreu i diplomacisë shqiptare në mandatin e parë të Ramës, “Perëndimi e ka
përkëdhelur Serbinë veçanërisht dy vitet e fundit, pas agresionit rus në Ukrainë. I ka shkelur syrin qoftë për qasjen autokratike, qoftë për qasjen ndaj fqinjëve. Shqipërisë nuk i takon ky pozicion, sepse ne, përpara se të jemi euroatlantikë, kemi interesat tona kombëtare si shqiptarë. Shihni Kroacinë si reagon për çdo gjë që bën Serbia në Kosovë. Janë kroatët më pak apo më shumë euroatlantikë se ne? Jo! Kanë një interes kombëtar më shumë se ne në Kosovë? Kurrësesi!”.
Nga ana tjetër, Bushati mendon se në vend të dialogut, sipas tij të dështuar, BE duhet t’i qaset vetes në raport me Kosovën dhe Serbinë.
“BE, minimalisht, duhet të ketë një qasje në bllok. Nuk e ka këtë. Në rast se nuk ka një lëvizje nga pesëshja që nuk e njeh brenda BE-së dhe nga katërshja që nuk e njeh brenda NATO-s, është e kotë që të presim, që jo Aleksandar Vuçiç, por edhe demokrati më i madh që të jetë në krye të Serbisë, ta njohë Kosovën. Hapin e parë duhet ta bëjë Bashkimi Europian,” tha Bushati. /tesheshi.com/
