Nga Bashkim Kastrati
Kosova që nga viti 2013 ka filluar me grumbullimin e rezervave shtetërore të mallrave, si produkte esenciale ushqimore, agro-ushqimore dhe produkte të derivateve të naftës etj. Por në këto rezerva shtetërore ende nuk janë të përfshira barnat nga lista esenciale që do të duhej të ishin pjesë e rezervave shtetërore.
Përfshirjen e barnave nga lista esenciale në rezerva shtetërore e obligon edhe Ligji për Rezervat Shtetërore në nenin 12 – pikën 1.2.
“Prodhimet e caktuara joushqimore industriale-lëndët e para, materiale reprodukuese, naftës dhe derivate të saj, barnat, material sanitar, dhe mjete medicino-veterinare të domosdoshëm për transport-bartje të mallrave me interes të posaçëm për mbrojtje të shtetit”, thuhet në këtë nen.
Rezervat shtetërore të mallrave krijohen për të ndërhyrë në mënyrë operative për mbrojtjen e popullsisë, ekonomisë në rast të çrregullimit të tregut, mbrojtjes së vendit, në situata të gjendjes së jashtëzakonshme, gjendjes së emergjencës civile, veprimeve terroriste, veprimeve ushtarake në gjendje lufte, të cilat sjellin dëme të menjëhershme e të rënda për jetën, shëndetin e popullatës, gjësë së gjallë, pasurisë, trashëgimisë kulturore, mjedisin si dhe për dhënien e ndihmave humanitare, në përputhje me normat e së drejtës ndërkombëtare.
Neglizhenca e Ministrisë së Shëndetësisë
Mungesa e barnave në rezervat shtetërore ka ngecur tek Ministria e Shëndetësisë, e cila nuk e ka përpiluar me kohë listën esenciale të këtyre barnave, e cila i është kërkuar nga Ministria e Tregtisë dhe Industrisë dhe është e domosdoshme për planifikim.
Shaban Halimi, Udhëheqës i Departamentit për Rezervat Shtetërore të Mallrave në Ministrinë e Tregtisë dhe Industrisë (MTI), ka thënë për tesheshi.com se që nga viti 2013 i janë drejtuar me shkresa zyrtare përfaqësuesve të Ministrisë së Shëndetësisë që të hartojnë një listë nga lista esenciale e barnave dhe material sanitar, pasi që aty ka pasur disa herë ndryshime kadrovike dhe nuk kanë arritur që ta përfundojnë një listë të tillë, kështu që kemi mbetur pa e planifikuar ne programin vjetor 2013-2015.
“Tani me një vendim të dy sekretarëve ati te MTI-së dhe MSH-së jemi një grup punues duke e hartuar një listë të barnave dhe materialit sanitar, jemi në fazën përfundimtare të konsultimeve dhe shumë shpejt shpresojmë që ta përfundojmë në mënyrë që ta përcjellim në Qeveri për miratim me programin vjetor 2016-2018”, thotë Halimi.
Tesheshi.com ka kontaktuar edhe me Ministrinë e Shëndetësisë për këtë çështje, por edhe pas premtimeve se do të marrim një përgjigje me shkrim, edhe pas pritjes për dy javë dhe insistimit të kohëpaskohshëm, kjo ministri nuk ka kthyer përgjigje për këtë çështje.
Ja çfarë rezervash shtetërore posedon Kosova
Shaban Halimi tregon se aktualisht Kosova ka rezerva për disa produkte që konsiderohen elementare dhe që duhet të jenë në dispozicion për situata emergjente apo të jashtëzakonshme. Ai thotë se rezervat shtetërore do të shtohen edhe me disa produkte të tjera në vitin e ardhshëm.
“Jemi të përqendruar në grurë, miell, oriz, sheqer, konserva mish, konserva peshku, vaj, makarona, marmelatë,dhe kripë. Kurse, nga produktet joushqimore, kemi derivate të naftës, atë në një sasi të konsiderueshme për ndonjë nevojë emergjente të paraparë sipas ligjit. Ndërsa nga viti 2016 kemi planifikuar të fusim në program vjetor për furnizim edhe listën esenciale të barnave dhe materialit sanitar. Sasia dhe vendndodhja e rezervave shtetërore të mallrave me ligj konsiderohen sekret shtetëror”, theksoi Halimi.
Plani strategjik dhe Programi vjetor për rezerva shtetërore të mallrave aprovohen nga Qeveria e Kosovës në propozim të MTI-së pas harmonizimit me Ministrinë e Ekonomisë dhe Financave, Ministrinë e Shëndetësisë, Ministrinë e Forcave të Sigurisë së Kosovës, Ministrinë e Bujqësisë Pylltarisë dhe Zhvillimit Rural,- Agjencia për Veterinari dhe Ushqim Ministrinë e Punëve të Brendshme, Ministrinë e Energjisë dhe Minierave dhe Ministrinë e Infrastrukturës. Ky koordinim është i përcaktuar me Ligjin për Rezerva Shtetërore.
Gjithashtu me këtë ligj përcaktohet procedura e krijimit, sigurimit, financimit, deponimit, ruajtjes, përdorimit, menaxhimit, përtëritjes, freskimit dhe shpërndarjes së rezervave shtetërore të mallrave në Republikën e Kosovës. /tesheshi.com/
