Nga Blendi Gashi
Kosova ka patur mjaft fakte për ta paditur Serbinë për gjenocid, për krime lufte, apo të paktën për dëmet gjatë luftës, por nuk e ka bërë një gjë të tillë edhe pse kanë kalur 16 vite.
Qeveria e Kosovës krijoi në vitin 2011 Institutin për Hulumtimin e Krimeve të Luftës, në kuadër të Ministrisë së Drejtësisë, me qëllim mbledhjen e fakteve për të argumentuar, “të vërtetën shkencore dhe profesionale për krimet e luftës”.
Por pesë vjet pas përurimit të këtij instituti, ai ende është “në konsolidim e sipër”.
Ngritjen e padisë ndaj Serbisë e paralajmëroi edhe ish-kryeministri Hashim Thaçi para Këshillit të Sigurimit, në mbledhjen e 26 majit të vitit 2015.
Megjithatë, zotimi i Thaçit ka mbetur veç një deklarim, pasi ai vazhdon të shkojë në Bruksel e të bisedojë me Serbinë për t’i “normalizuar marrëdhëniet”, por asnjëherë nuk ka marrë guximin ta ngrejë padinë e paralajmëruar, edhe pse ka tre mandate në pushtet.
Njohës të çështjeve kushtetuese dhe analistë politikë nuk kanë shpresa se klasa politike kosovare do të ketë guximin të ngrejë padi ndaj qeverisë serbe për gjenocidin dhe dëmet që ka bërë Serbia gjatë luftës së fundit në Kosovë.
Njohësi i çështjeve kushtetuese, Riza Smaka, thotë se në kohën sa ishte deputet në legjislaturën e tretë, këtë çështje e ka ngritur si mocion parlamentar, si shqetësim të qytetarëve, si pyetje ekzekutivit: Pse qeveria nuk ka ngritur padi për gjenocidin e kryer nga shteti serb në Kosovë?
Ish-deputeti Smaka shprehet se mosngritja e padisë është një lëshim i madh i bërë nga qeveria. Për çka
thotë se do të duhej edhe të shkarkohej, për papërgjegjësinë ndaj popullit dhe interesave të vendit të vet.
Ai deklaron se qeveria e Kosovës nuk e ngre këtë padi pasi nuk ka kredibilitet, legjitimitet dhe, mbi të gjitha, kapacitet politik e qeveritar.
“Nuk besoj se kjo qeveri do të ngrejë padi ndaj Serbisë as këtë vit e as vitin tjetër, sepse nuk ka kapacitete as kadrovike, as profesionale, e as morale, ngaqë është e shantazhuar dhe bën koncesione në dëm të shtetit.
Jam thellësisht i bindur se kjo qeveri as që e ka ndërmend ta ngrejë këtë çështje, pra, të ngrejë padi ndaj Serbisë, edhe pse do të duhej që çdo qeveri e përgjegjshme ta bënte një gjë të tillë.
Nuk ka qeveri në Europë që nuk do të kishte ngritur kërkesë-padi për rimbursimin e dëmeve materiale dhe morale, e që nuk do të kishte lënë institucion apo hallkë institucionale pa aktivizuar kundër shtetit që ka bërë gjenocid dhe ka shkaktuar dëme të pariparueshme,” ka thënë Smaka për tesheshi.com.
Ndërsa Faik Krasniqi, njohësi i rrethanave politike në vend, thotë se nuk mban mend që Hashim Thaçi të ketë mbajtur ndonjë premtim të dhënë, andaj nuk ka pse t’i besohet se do ta padisë Serbinë për gjenocid.
“Unë nuk besoj se do të ketë një padi të tillë. Qeveria e Kosovës dhe Hashim Thaçi nuk është dashur t’i fillonin bisedimet me Serbinë në Bruksel para se Serbia të na kërkonte falje për krimet e luftës, e para kompensimit të dëmeve të luftës. Fillimi i bisedimeve me Serbinë pa asnjë kusht ka bërë që sot kjo e fundit të ketë krijuar një avantazh të madh karshi Kosovës. Serbia, edhe pse agresore, u shpërblye nga ana e BE-së me liberalizim të vizave, me statusin kandidat për në BE, me ndihma ekonomike, dhe me krijimin e Asociacionit të komunave me shumicë serbe, kurse Kosova, edhe pse viktimë, u ndëshkua me izolim nga BE-ja dhe cungim të sovranitetit. E gjitha kjo për shkak të paaftësisë të këtij pushteti të papërgjegjshëm, kriminal dhe mafioz, të këtyre drejtuesve që edhe pse për 17 vite rresht po na udhëheqin në mënyrën më të keqe, nuk e kanë ndërmend të përmirësohen, por janë bërë edhe më arrogantë seç kanë qenë,” kanë qënë fjalët e Krasniqit për tesheshi.com.
Deputeti i NISMA për Kosovën, Bilal Sherifi, ka shkruar kohë më parë në Facebook se padia për gjenocid
ndaj Serbisë duhet përgatitur medoemos dhe të dorëzohet në Gjykatën Ndërkombëtare të Drejtësisë.
“Me Hashimin apo pa Hashimin ajo do të ndodhë,” ka thënë ai.
Ndryshe, ministri i Drejtësisë, Hajredin Kuçi, me rastin e përurimit të Institutit për Hulumtimin e Krimeve të Luftës në 2011-tën, pati theksuar se argumentimi i gjenocidit do të bëhej larg politikës dhe në mënyrën më profesionale.
“Jam shumë i bindur që argumentet tona, e drejta jonë e luftës, dhe vuajtjet tona deri në shkallë të gjenocidit, do të argumentohen në mënyrën më të mirë profesionale, dhe politika nuk do të jetë pengesë për trajtimin e tyre, përkundrazi do të jetë një mbështetje e plotë që e vërteta shkencore t’i ndihmojë edhe politikës, por edhe qasjes sonë, jo vetëm për sot, por edhe për të ardhmen dhe gjeneratat që do të vijnë,” pati thënë Kuçi. /tesheshi.com/
