Nga Bashkim Kastrati
Me hapjen e fushatës elektorale për zgjedhjet lokale të 2 tetorit, kanë filluar edhe premtimet. Por përveç atyre në nivel lokal, që po i bën secili kandidat, një tjetër ka ardhur edhe nga Qeveria e Kosovës. Ministri i Financave, Bedri Hamza, ka premtuar rritje pagash në sektorin publik nga 1 janari i vitit të ardhshëm, në bazë të rritjes ekonomike.
“Tani është rritur baza e pagave dhe rritja duhet të jetë në përputhje me rritjen ekonomike dhe mundësitë buxhetore”, tha Hamza.
Ministri Hamza, gjithashtu, ka premtuar se buxheti i vitit të ardhshëm do të jetë mbi dy miliardë euro.
“Do të jetë buxhet i qëndrueshëm, i bazuar në rritje ekonomike”, tha ai.
Hamza u emërua ministër në kabinetin e Haradinajt, duke lënë postin e guvernatorit të Bankës Qendrore të Kosovës, për të sjellë premtime për rritje rrogash.
Është bërë zakon që në kohë zgjedhjesh të fillohet me punë të ndryshme dhe me projekte sidomos infrastrukturore, por edhe me premtime për hapjen e vendeve të punës, rritje të pagave, investimet në fushën e bujqësisë etj.
Por zakonisht këto premtime mbyllen me mbylljen e fushatës elektorale dhe ata që i kanë premtuar i gjejnë dhjetëra fajtorë për mosrealizimin e këtyre premtimeve
Nuk ka kushte politike as ekonomike për një rritje të pagave
Ekonomisti Lulzim Beqiri ka thënë për tesheshi.com se në rrethanat aktuale dhe me ritmin e rritjes ekonomike është e pamundur që të ketë rritje të pagave për sektorin publik.
“Kosova nuk e ka luksin e rritjes së pagave në sektorin publik. Republika e Kosovës po ballafaqohet me krizën më të madhe që nga paslufta, një situatë e kaosit e dhunës me një Qeveri shumë të diskutueshme, pra nuk ka kushte as politike e as rritje ekonomike për një ngritje prej 25% apo 30% siç pretendon ministri, për një rritje të pagave do të duhej një rritje dyfishtë 8% ose 10%.
Ai thotë se ky premtim me vetë faktin se po bëhet në një fushatë elektorale ka tendenca për të fituar përkrahje nga qytetarët, pasi që njihen praktika të tilla edhe nga qeveritë e kaluara, kur gjatë fushatës elektorale premtonin me qindra mijëra vende pune dhe rritje të pagave.
“Premtimet e rritjes së pagave më shumë janë për ti ruajtur militantët e partive të tyre, kjo rritje duke anashkaluar sektorin privat është tendencioze dhe e pa moralshme, përderisa sektori privat punëson numrin më të madh të punëtorëve, ky sektor është lënë në mëshirën e fatit, mos harroni që në vitin 2017 në vendin e punës kanë humb jetën 14 punëtorë, këtij vendi i duhet siguri, shkarkim të administratës e sistemim të ri”, theksoi Beqiri.
Ai thotë se para se të mendohet për rritjen e pagave në sektorin publik, duhet të shqyrtohen të gjitha mbi punësimet që janë bërë në institucionet shtetërore, pasi që një pjesë e tyre marrin paga pa bërë pothuajse asnjë punë, por janë punësuar mbi baza partiake dhe familjare.
“Pra nuk ka kuptim një rritje e tillë e pagave në këtë krizë që po e kalon vendi, më qindra mijëra raste sociale me një papunësi rekorde deri në 50%, s’ka vend për rritje, e udhës do të ishte të shkarkohet administrate dhe të hartohen politika në mbështetje të sektorit privat”, u shpreh ekonomisti Beqiri.
Ndryshe, rritje të pagave për të gjitha kategoritë e të punësuarve publik, prej 25 deri në 50 për qind ka pasur edhe në vitin 2014 edhe më herët më 2011, vite këto kur ka pasur zgjedhje në Kosovë.
Sipas të dhënave, paga neto mesatare në Kosovë për sektorin publik është mbi 420 euro në muaj, derisa, sipas të dhënave të organizatave ekonomike në sektorin privat, paga mesatare është rreth 349 euro. /tesheshi.com/
