Kosova nuk i plotëson kushtet për liberalizimin e vizave, e pohojnë vetë krerët e shtetit

Presidentja e Kosovës, Atifete Jahjaga ka mbledhur sot Këshillin Kombëtar për Integrim Evropian, për të diskutuar rreth kritereve që Kosova duhet të plotësojë për të marrë liberalizimin e vizave.

Në këtë takim të pranishëm ishin kryeministri Isa Mustafa, kryetari i Kuvendit Kadri Veseli, ministri i Integrimeve Evropiane Bekim Çollaku dhe përfaqësuesi i BE-së në Kosovë Samuel Zhbogar, ku u theksua se Kosova ende nuk i ka plotësuar kriteret e kërkuara nga Bashkimi Evropian për procesin e liberalizimit të vizave.

Kosovës i ka mbetur edhe pak kohë që ta dërgojë raportin për përmbushjen e kritereve për liberalizimin e vizave. Ndërsa ministri i Integrimeve Evropiane Bekim Çollaku, tha se ky raport është në gjendje të keqe dhe si i tillë në çfarë gjendje është tani nuk paraqet përmbushje të kritereve.

Por, Presidentja e vendit Atifete Jahjaga, kërkoi nga institucionet t’i përmbushin detyrimet që kanë dhe të mos vonohen në përmbushjen e detyrave për liberalizim, duke theksuar në të njëjtën kohë se ky proces është vonuar edhe nga vala e fundit e migrimeve.

Po ashtu edhe kryetari i Kuvendit Kadri Veseli, i bëri thirrje Bashkimit Evropian, më konkretisht përfaqësuesit të BE-së në Kosovë Samuel Zhbogar që të ndikojë në Bashkimin Evropian që shqiptarët e Kosovës të kenë të drejtë të udhëtojnë pa viza në zonën Shëngen.

Ndërsa në fjalwn e tij kryeministri i Kosovës Isa Mustafa po ashtu e bëri të njëjtën thirrje duke i përmendur vështirësitë që kanë qytetarët e Kosovës për aplikim për viza. Ky i fundit përmendi rastet e studentëve, të sëmurëve që kërkojnë shërimin jashtë vendit, personat që familjarët i kanë jashtë vendit dhe nuk mund t’i vizitojnë për shkak të mos-liberalizimit. /tesheshi.com/