Nga: Bashkim Kastrati
Në Kosovë fushata e korrje-shirjeve është duke shkuar kah fundit. Sipas zyrtarëve të Ministrisë së Bujqësisë, Pylltarisë dhe Zhvillimit Rural, priten rendimente më të larta sesa vitin e kaluar, pasi gjendja e grurit është shumë e mirë. Kjo për shkak të, siç thonë ata, kushteve atmosferike, si dhe një kujdesi më të shtuar të fermerëve.
Sipas kësaj ministrie, në këtë vit kanë qenë rreth 90 mijë hektarë të kultivuara me drithëra, nga të cilat rreth 84 mijë e 500 hektarë vetëm me grurë.
Bazuar në sipërfaqen e mbjellë më grurë dhe rendimentet mesatare, Cikaqi shpreson që Kosova deri në 90 për qind do të plotësojë nevojat e popullatës për ushqim, nëse gruri nuk eksportohet në shtetet tjera.
Sipas Ministrisë së Bujqësisë rendimentet sivjet janë të kënaqshme dhe sillen nga 3,500-4,500 e në raste të veçanta kemi edhe rekordin 8,000 – 8,500 kilogramë për një hektar. Ndërsa rendimentet mesatare pritet të jenë në mes 4,000 – 4,600 kilogramë për një hektar.
Sipas të dhënave të Ministrisë së Bujqësisë në tri vitet e fundit janë investuar 17 milionë e 830 mijë e 204 euro, ku kanë përfituar rreth 32 mijë fermerë. Por edhe pas këtij investimi të parvjetshëm, numri i hektarëve të mbjella me grurë nuk ka shënuar rritje. Në Kosovë në vitet e fundit mbillen rreth 45 mijë hektarë tokë me grurë.
Tahiri: Kosova ka siguruar 35 % të nevojave me grurë, ka vonesa në subvencione dominon importi nga Serbia
Tahir Tahiri kryetar i Federatës Sindikale të Bujqve të Kosovës (FSBK) ka thënë për tesheshi.com se sivjet FSBK-ja ka informata që përafërsisht me grurë nga prodhimi vendor janë siguruar 35% të nevojave për ushqim të popullatës.
“Po, qeveria e ka mirë që thotë se e ka siguruar sasinë e drithit për 90% të duhur, po del se 55% të sasisë së grurit e kanë siguruar prej Serbisë, gjë të cilën e kemi parë ne vet, m’u në sezonin e korrjeve mullixhijtë (pronarët e mullinjve) po sjellin grurë nga Serbia, e cila po ua shet grurin që duhet me përdorë për ushqim të kafshëve, sepse ata është të rezervave shtetërore që ka kaluar afatin 3-4 vjeçar dhe zëvendësohet me grurë të ri. Kështu mullixhitë po e ulin çmimin e grurit deri në 14 centë, sepse ata të rezervave Serbia ua shet shumë lirë. Me ketë rast po dëmtohen aq shumë prodhuesit Kosovar sa që disa detyrohen të heqin dorë nga kultivimi i grurit”, thotë Tahiri.
Ai thotë se subvencionet për grurin janë minimale, pasi që ato nuk jepen me kohë dhe keqpërdoren në forma të ndryshme, prandaj nuk e kanë dhenë efektin e paraparë. Ai thotë se këtë vit u korrë gruri dhe bujqit nuk i kanë marrë ende subvencionin për grurin e korrur.
“Tash e tutje edhe nëse ua dhenë ato para, bujqit mund të shkojnë në deti për pushime me ato para, përndryshe ato para nuk i kontribuojnë rritjes se rendimentit të grurit, do të thotë ato para nuk e kanë luajtur rolin par çka dedikohen”, theksoi Tahiri.
Pavarësisht investimeve, nuk ka rënie të importit
Tahir Tahiri pavarësisht ndarjes së miliona eurove nga Ministria e Bujqësisë, nuk ka rënie të importit të grurit sepse Qeveria nuk po krijon kushte për rritjen e sipërfaqeve të mbjella me grurë dhe nuk ka kushte për arritjen e mesatares se rendimentit, me plehra false, me farëra e pesticide false nuk arrihen rendimente të dëshiruara të mundshme.
“Kur janë shtrenjtë plehrat bujqit përdorin sasi më të vogla të plehut, po ashtu farërat janë shtrenjtë dhe bujqit përdorin farë të drithit nga hambari i tij dhe me këto masa agroteknike bujqit e Kosovës kurrë nuk ka për të mundur që të sigurojnë bukën për nevojat e duhura për popullatë”, u shpreh Tahiri.
Ai thotë se fushata e korrjeve ka shkuar relativisht mirë, fale kushteve të mira atmosferike, shqetësim për në dhe bujqit është derdhja enorme e drithit nga makineritë e stërvjetëruar dhe mospërshtatja e shpejtësisë së tyre gjatë korrjes. /tesheshi.com/
