Përfaqësuesi Special i Bashkimit Evropian për Dialogun Kosovë-Serbi, Miroslav Lajçak dhe Përfaqësuesi Special i SHBA-së për Ballkanin Perëndimor, Gabriel Escobar, pas takimit me presidentin serb Aleksandar Vuçiç në Beograd vlerësuan se takimi ishte i vështirë, por përfaqësonte një diskutim të përgjegjshëm.
Miroslav Lajçak ka njoftuar në Twitter pas takimit se takimi me Vuçiçin ka qenë një diskutim i vështirë por i përgjegjshëm.
“I përcolla mesazhet dhe theksova se të gjitha marrëveshjet e arritura në kuadër të dialogut duhet të zbatohen, duke përfshirë edhe Marrëveshjen për Lirinë e Lëvizjes nga viti 2011. Ne do t’i vazhdojmë bisedimet më vonë sonte”, tha Lajçak.
Escobar, i cili së bashku me Lajçak u larguan nga ndërtesa e Sekretariatit të Përgjithshëm të Presidentit të Republikës së Serbisë, tha se kanë pasur një “takim të vështirë dhe të gjatë me presidentin Vuçiç”.
“Ne vlerësojmë përkushtimin e presidentit për paqen dhe stabilitetin. Ne po ecim përpara”, tha Escobar, siç raportohet nga ambasada amerikane në Tëitter.
“Interesat jetike”
Vuçiç pas takimit tha se “nuk do të heqë dorë nga interesat jetike kombëtare dhe shtetërore, mbi të gjitha nga interesat dhe siguria e serbëve në Kosovë e Metohi”.
Ai bëri të ditur se sonte do të vazhdojnë bisedimet me Escobarin dhe Lajçakun, ku marrin pjesë ambasadorët e SHBA-së dhe BE-së në Serbi, Christopher Hill dhe Emanuele Giaufret.
“Kemi pasur biseda të vështira me Miroslav Lajçak dhe Gabriel Escobar. Ne po vazhdojmë bisedimet sonte pas orës 22:00 për çështjen e Kosovës”, ka thënë Vuçiç në një video-mesazh në profilin e tij në Instagram.
“Asnjë sekondë, të jeni të sigurt, ashtu siç ju premtova, ne nuk do të devijojmë nga interesat tona jetike kombëtare e shtetërore, mbi të gjitha nga interesat e popullit tonë, siguria juaj. Nuk ka dorëzim, nuk ka dorëzim”, tha ai.
Vizitë në Prishtinë
Lajçak dhe Escobar erdhën në Beograd nga Prishtina, ku biseduan me zyrtarë të Kosovës, në përpjekje për të arritur një marrëveshje ndërmjet Serbisë dhe Kosovës, në pritje të 1 shtatorit, kur Prishtina e shtyu vendimin për reprocitetin në kufi.
I pari që mbërriti të martën në Prishtinë ishte Escobar, i cili foli me presidenten e Kosovës Vjosa Osmani, si dhe me liderët e partive opozitare.
Të mërkurën në Prishtinë mbërriti edhe Miroslav Lajçak, i cili bisedoi me Osmanin, por edhe me kryeministrin e Kosovës Albin Kurti, liderët e partive opozitare dhe përfaqësuesit e serbëve në Kosovë.
Vizita e Lajçakut dhe Escobarit vjen pas raundit të dështuar të dialogut ndërmjet Kosovës dhe Serbisë në nivelin më të lartë, javën e kaluar në Bruksel.
Qëllimi i vizitës së tyre është parandalimi i tensioneve të reja, mbi të gjitha në veri të Kosovës. /tesheshi.com/
