Zv.kryeministri dhe ministri i Punëve të Jashtme Hashim Thaçi ka zbuluar logon zyrtare të 8-vjetorit të Pavarësisë së Kosovës.
Ai ka ftuar të gjithë që këtë fotografi ta bëjnë “cover” në llogaritë e tyre në Facebook.
“Të nderuar miq përvjetori i 8-të i Pavarësisë së Republikës së Kosovës është duke u afruar prandaj unë ju ftoj të vendosni edhe ju këtë cover festiv në faqen tuaj të facebook-ut.
Shpallja e Pavarësisë më 17 shkurt 2008 ishte kurorëzimi i një rruge të mundimshme plot përpjekje dhe sakrifica prandaj në nderim të gjithë atyre brezave që kanë ëndërruar, punuar dhe luftuar për ditët e lirisë dhe pavarësisë që gëzojmë sot ju ftoj që ta festojmë të gjithë së bashku këtë ditë të papërsëritshme të historisë së popullit tonë”, ka shkruar Thaçi në Facebook.
Por, në situatën që po kalon Kosova, pavarësia e saj duket e zhvlerësuar në maksimum. Festa e para 8 viteve duket e venitur, ndërkohë që njohjet kanë ngecur, vendin e kërcënon “Zajednica” , një “Serbi” brenda Kosovës, që kriza e thellë politike nga kjo e fundit e kanë zhytur vendin në kolaps.
Sakaq, nuk është një përvjetor i rrumbullakosur pavarësia, sicc mund të ishte 10-vjetori, që do e meritonte vërtet një logo. Është 8-vjetori, dhe logoja, duket qartazi që është një tërheqje e vëmendjes nga situata e rëndë, një lloj amnezie për ta harruar aktualen.
E ndërkohë që kreu i PDK-së ka ftuar qytetarët të festojnë më 17 shkurt, opozita kosovare ka bërë thirrje për një protestë të madhe në Prishtinë, pikërisht po atë ditë, në 8-vjetorin e Pavarësisë. /tesheshi.com/
