Reagimeve të shumta ndaj Koresë së Veriut për testimin e vazhdueshëm të raketave me mbushje bërthamore apo hidrogjen, iu është bashkuar edhe Kosova.
Ministria e Punëve të Jashtme, e drejtuar nga Behgjet Pacolli, i konsideron të papranueshme zhvillimet e vazhdueshme të programeve nukleare dhe balistike nga Korea e Veriut, që në mënyrë flagrante shkelin rezolutat e shumëfishta të Këshillit të Sigurimit.
“Ministria e Punëve të Jashtme rreshtohet përkrah botës demokratike në dënimin e çdo aktiviteti të paligjshëm që kërcënon dhe rrezikon seriozisht paqen, sigurinë dhe rendin ndërkombëtar. Mbetemi të palëkundur në angazhimet dhe përpjekjet e fuqishme për të punuar me vendet aleate, partnere dhe komunitetin e gjerë ndërkombëtarë, që të shërbejmë si një kontribues aktiv për paqen, progresin dhe sigurinë ndërkombëtare”, thuhet në reagim. /tesheshi.com/
