Me iniciativë të presidentes së Kosovës, Atifete Jahjaga, në Prishtinë u zbulua një pllakë përkujtimore në nderim të ushtarëve sllovakë që humbën jetën në aksidentin ajror duke u kthyer nga misioni i tyre në kuadër të KFOR-it në Kosovë.
Presidentja bashkë me zv. kryeministrin dhe ministrin e Punëve të Jashtme dhe Çështjeve Evropiane të Sllovakisë Miroslav Lajčák, kujtuan ata të cilët para 10 ditëve u vranë në përmbyllje të misionit të tyre paqeruajtës në Kosovë.
Kjo u cilësua nga presidentja e Kosovës si humbja më e madhe e misionit të NATO-së në Kosovë.
“Ne kemi ecur përpara të bindur në përcaktimin tonë Euro-Atlantik dh e të pa zbrapsur në arritjen e këtij synimi. Këta 43 paqeruajtës dhe mijëra të tjerë që kaluan nëpër Kosovë, janë pjesë e pandashme e historisë tonë të re. Kosova gjithmonë do të jetë falënderuese për kontributin e tyre dhe këtë sakrificë sublime”, tha Jahjaga.
E Miroslav Lajčák, falënderoi presidenten për këtë iniciativë për të përkujtuar ushtarët e vrarë përmes kësaj pllake përkujtimore.
Misioni i tyre sipas Lajčák ishte që të japin më të mirën për të ardhmen e Kosovës.
“Para 10 vitesh, 43 ushtarët e Sllovakisë përmbushën të gjitha detyrat e tyre në Kosovë, ata ishin rrugës për në shtëpi për të takuar familjarët e tyre, por fatkeqësisht ata nuk arritën. 43 prej tyre vdiqën në aksidentin afër kufirit Sllovak, vetëm 1 prej tyre arriti të shpëtojë i gjallë. Duket vërtetë si një përfundim heroik ku heroi përfundon misionin e tij dhe vdes, por fatkeqësisht ky nuk është një libër, por një e vërtetë dhe heronjtë të vërtetë”, tha Lajčák.
/tesheshi.com/
