Gjykata Speciale pritet të hetojë dhe gjykojë krimet që supozohet se janë kryer nga drejtues të UÇK-së gjatë viteve 1998-2000, e që janë përmbledhur në raportin e Asamblesë së Këshillit të Evropës, autor i të cilit është senatori Dick Marty.
Por, analistët ndërkombëtarë vënë në dukje se Kosova duhet të jetë në gjendje t’i gjykojë edhe vetë krimet e luftës, të cilat nuk preken nga Gjykata Speciale.
James Ker-Lindsay, kërkues në Shkollën për Shkenca Politike dhe Ekonomi ka thënë se Kosova duhet ta ndjekë shembullin e fqinjëve, duke trajtuar krimet brenda sistemit të vet gjyqësor.
“Siç e kemi parë në të gjithë ish-Jugosllavinë, krimet e luftës, janë gjykuar në Tribunalin Ndërkombëtar të Hagës, por ka pasur edhe gjyqe për krimet e luftës brenda Serbisë, Bosnjës dhe Kroacisë”, ka thënë Lindsay.
Sipas tij, pritet që kjo të ndodhë edhe në Kosovë. Hetimet që ka kryer deri tani EULEX, sipas Lindsay, nuk kanë përfunduar në procese gjyqësore. /tesheshi.com/
