Kosova kujton sot 2 korrikun saj, që, ndërsa në Shqipëri hapeshin ambasadat për një eksod historik, i cili do shënonte dhe goditjen e parë serioze ndaj regjimit komunist, një Deklaratë Kushtetuese do e shpallte Kosovën të pavarur.
Ishte një pavarësi që sigurisht nuk u njoh ndërkombëtarisht, por ama ishte vijim i atyre akteve të kundërshtimit të regjimit të Beogradit, që vite më pas do çonte drejt rrëmbimit të armëve, deri në finalizimin e një kauze të nisur nga studentët që në fillimtë viteve ’90, për një Kosovë jo nën Serbi, ndonëse për rrethanat politike të asaj kohe nën ish-Jugosllavi, kërkohej vetëm të qënit e Kosovës republikë.
Kryeminsitri Haradinaj e konsideron 2 Korrikun ’90 si pikënisjen e shtetësisë së Kosovës.
“Deklarata Kushtetuese e 2 korrikut të vitit 1990, shënon pikënisjen e shtetësisë së Kosovës. Kjo ditë, që i dha kahje të re përpjekjeve tona për liri dhe pavarësi është rezultat i përpjekjeve shekullore të popullit tonë për ta realizuar idealin e lirisë. Gratë dhe burrat, që e vulosen vullnetin e popullit tonë, do të kujtohen dhe lartësohen nga brezat për përpjekjen e tyre për jetësimin e ëndrrës shekullore, shtetit të pavarur”, shkroi ai, për t’u pasuar nga konsideratat e kryeparlamentarit Veseli.
“Deklarata Kushtetuese e 2 korrikut është një moment kthese historike në rrugëtimin e popullit tonë për liri e pavarësi. Sot pata kënaqësinë që të takojë disa nga delegatët që ishin pjesë e kësaj ngjarje të madhe. Së bashku evokuam përjetimet e asaj kohe, por edhe këto zhvillimet aktuale nëpër të cilat është duke kaluar shteti ynë. Respekt dhe nderim vendosmërisë historike të delegatëve të 2 korrikut”, shkroi Veseli.
Ndërkohë, vite më vonë, hapja e ambasadave në Tiranë po në të njëjtën ditë kur Kosova shpallte pavarësinë, u gjykuar si një zhvillim konspirativ, me qëllim dëmtimin e kauzës kosovare.
E gjithë ky zhvillim në dy anët e kufirit, ndodhte teksa e gjithë bota, edhe ajo shqiptare sigurisht, ishte dhe nën ethet e Botërorit Italia ’90. /tesheshi.com/
