Xhudistja pejane, Majlinda Kelmendi, u prit si heroinë sot në Kosovë pas kthimit të saj nga lojrat olimpike të Rios, në të cilat mori një medalje të artë në peshën 52 kilogramë, e para kjo për Kosovën në një aktivitet të këtyre përmasave, për sa është shtet i pavarur.
Veç pritjes në aeroportin “Adem Jashari”, asaj iu rezervua një pritje dhe në qytetin e lindjes e ku jeton, në Pejë, ku autoritetet vendase dhe njerëz të thjeshtë, e uruan për rezultatin e arritur.
Sipas tyre, ajo tashmë është ambasadorja më e mirë dhe më e denjë për Kosovën.
Ditët në vijim, pritet që Kelmendit t’i rezervohen pritje dhe nderime edhe nga krerë të lartë të Kosovës.
Ditë më parë, në mediat shqiptare u provokua një debat rreth saj, i tipit “hedh budallai një gur në lum, futen të tjerë e nuk e nxjerrin dot”, mu për faktin se ajo, gjatë marrjes së medaljes ngriti flamurin e Kosovës e jo atë shqiptar. /tesheshi.com/
