Kosova shpalli “non grata” një rus të UNMIK-ut, duke pretenduar në shkelje të rënda të tij.
“Me kërkesë të Kryeministrit të Republikës së Kosovës, z. Albin Kurti, sot kam nxjerrë vendimin për shpalljen persona non grata të një zyrtari rus të UNMIK-ut në Kosovë për shkak të veprimtarisë së tij të dëmshme, e cila ka cenuar sigurinë kombëtare të Republikës së Kosovës. Njëkohësisht kam njoftuar institucionet ligjzbatuese dhe autoritetet përkatëse për zbatimin e këtij vendimi.
Institucionet e Republikës së Kosovës mbeten të vendosura në betejën kundër ndikimit malinj të Federatës Ruse dhe përfaqësuesve e satelitëve të saj në rajon, të cilët synojnë të minojnë arritjet e Kosovës dhe të partnerëve tanë, e në radhë të parë të SHBA-ve, NATO-s dhe BE-së”, shkroi ndër të tjera ministrja e Jashtme, Donika Gërvalla
Fjala është për Andrey Nikolaevich Antonov. Ai ka qenë i ngarkuar me punë në degën e UNMIK-ut në Mitrovicën Veriore dhe thuhet se po ushtronte presion mbi strukturat politike serbe për të ndërmarrë veprime radikale.
“Që moti Antonov ka raporte shumë të mira me strukturat serbe në veri të Kosovës, mirëpo kohën e fundit ai ishte duke ushtruar presion të jashtëzakonshëm mbi strukturat politike serbe në komunat me shumicë serbe”, ka thënë zyrtari ndërkombëtar i mbetur anonim, duke shtuar se në të kaluarën Antonov ka punuar si zyrtar policor.
Sipas tij, cituar nga media e Prishtinës, “aq presion të madh ka ushtruar, sa për këtë serbët e kanë lajmëruar edhe Petar Petkoviqin dhe presidentin serb Vuçiçin”.
Antonov, sipas këtij zyrtari ndërkombëtar në UNMIK, ka qenë i angazhuar edhe në zmadhimin e elementit prorus në bllokadat që ishin bërë në veri në shtatorin e këtij viti, kur serbët po kundërshtonin masat e Qeverisë së Kosovës për reciprocitet me targa.
“Antonov ka pasur kontratë me UNMIK-un deri në qershor te vitit 2022, dhe UNMIK dy herë ka pranuar vërejtje për veprimet e tij në Mitrovicë”, ka thënë zyrtari ndërkombëtar.
Andrey Nikolaevich Antonov, është zyrtari i dytë rus i UNMIK-ut që shpallet “non grata”. Para tij ishte Mikhail Krasnoshchekov, i cili pas përpjekjes për ta ndaluar një aksion policor të Kosovës, u dëbua nga Kosova. /tesheshi.com/
