Përfaqësuesja e Kosovës do të ketë sonte një mbrëmje historike, pasi do të luajë për herë të parë në një fushatë kualifikuese, siç është ajo për Botërorin e 2018-tës.
E pranuar vetëm pak muaj më parë në dy organizmat kryesorë të futbollit europian e botëror, Kosova luan sonte ndaj Finlandës.
Një takim në kuadër të grupit I në fushatën kualifikuese europiane, ku Kosova gjendet së bashku me Kroacinë, Turqinë, Ukrainën, Islandën dhe Finlandën.
Ndërkohë që ankthi ka qenë i madh për një numër lojtarësh që kanë kërkuar leje nga FIFA për t’u aktivizuar me Kosovën, më në fund, vetëm pak orë para sfidës ka ardhur dhe aprovimi për ta.
Amir Rrahmani, Alban Meha, Herolind Shala, Milot Rashica, Samir Ujkani dhe Valon Berisha do të mund të luajnë sonte për Kosovën, duke i shtuar mundësitë për një paraqitje sa më të mirë.
Vendimi i FIFA-s ka sjellë gëzim te lojtarët e ekipi drejtues i Kosovës, që kanë festuar fort pas lejes së dhënë për aktivizimin e gjashtë lojtarëve. Një pjesë e tyre nuk kanë ngurruar të thonë se do të fitojnë sonte ndaj Finlandës.
Takimi mes Finlandës dhe Kosovës do të nisë në orën 20:45, e do të drejtohet nga gjyqtari sllovak Ivan Kružliak. /tesheshi.com/
