Kosova përfaqësohet denjësisht në Kupën e Zvicrës, duke kaluar turin e parë të saj.
Në pamje të parë duket si coroditje “vere” të shkruash togfjalësh të tillë, por fjala është për skuadrën modeste të FC Kosova të Zyrihut, e cila ka arritur të mundë rivalin respektiv dhe të kalojë në 1/32 e Kupës së Zvicrës.
Skuadra, e cila luan në kategori inferiore në Zvicër, ka në përbërje lojtarë të lindur ose të rritur në Kosovën shtet dhe financohet me kontribute gjithashtu tërësisht shqiptare.
Ajo u krijua në vitin 1994 dhe që prej 23 vjetësh, rrit talente kosovare, të cilët më pas, janë marrë nga skuadra më me emër në Zvicër.
Skuadra e futbollit ka qenë edhe një “mësimore” e mirë për shumë lojtarë kosovarë, të cilët, në faza të ndryshme tranzitore të karrierës, kanë patur mundësi të zhvillojnë stërvitje, apo të luajnë për të arritur formën optimale, me këtë skuadër.
Ditën e dielë, Fc Kosova fitoi pas kohës shtesë dhe ky avancim në kupën e Zvicrës, është festuar me ndijesi suksesi të madh nga klubi. /tesheshi.com/
