Nga: Bashkim Kastrati
Edhe pse kanë kaluar gati 17 vite që nga përfundimi i luftës, Kosova ende po përballet me probleme të furnizimit me energji elektrike. Reduktimet janë të theksuara sidomos gjatë dimrit, kur edhe konsumi është në nivelin më të lartë.
Prishtina është më e “privilegjuar” në aspektin e reduktimeve, por shumë komuna të tjera, sidomos fshatrat, përballën me kufizime të energjisë elektrike.
Qytetarët thonë se kohë pas kohe ka probleme të furnizimit me energji elektrike, por gjatë periudhës së fundit ka një furnizim më të mirë, sidomos në qytetet e mëdha, krahasuar me vitet e shkuara.
“Reduktime po kemi kohë pas kohe. Para disa javëve nuk ka pasur për disa orë energji elektrike, dhe normalisht që kjo paraqet probleme dhe pengesa të shumta. Shpresojmë që kur të ndërtohet termocentrali i ri të rregullohet njëherë e përgjithmonë çështja e furnizimit me energji elektrike. Pasi është shumë e pakuptimtë që Kosova ta blejë atë, ndërsa kemi plot rezerva natyrore për prodhimin e energjisë elektrike, e që janë ende të pashfrytëzuara,” shprehet Burimi nga qyteti i Istogut.
Zyrtarë të KEDS-it kanë deklaruar ditë më parë se ka një situatë të mirë të furnizmit me energji elektrike. Aktualisht janë tri blloqe në sistem, që prodhojnë diku te 650 megavat në orë energji elektrike, teksa pjesa tjetër importohet.
Në muajt e fundit ka reduktime të planifikuara të energjisë elektrike për shkak të, siç thuhet, ndërhyrjeve të ndryshme që bëhen në rrjetin e shpërndarjes.
Por ka një kohë të gjatë që KEDS-i njofton për çdo ditë për këto reduktime të planifikuara të cilat bëhen në vende të ndryshme. Aty tregohet për kohën dhe regjionet se kur do të ndërpritet energjia elektrike. Ndërprerjet me energji elektrike thuhet se nuk janë të gjata.
Arsyet që jep KEDS-i për këto ndërprerje kanë të bëjnë zakonisht me mirëmbajtjen e rrjetin energjetik.
Ndërkohë që po e shkruanim këtë tekst, erdhi e-mail-i i radhës nga KEDS-i që paralajmëron ndërprerje të planifikuar të energjisë elektrike për datën 31 mars. Në njoftim thuhet se do të ketë ndërhyrje në disa vende të ndryshme, me ç’rast shumë rrugë të disa qyteteve do të mbeten pa rrymë. Energjia elektrike do të ndërpritet në këtë datë në disa lagje të Prizrenit, të Dragashit, Pejës, Mitrovicës, Gjakovës dhe Gjilanit. Reduktimet planifikohen të zgjasin nga një deri në tre orë.
Mungesa e stabilitetit energjetik shkakton pengesa ekonomike
Pasiguria për furnizim me energji elektrike është konsideruar, edhe sipas disa raporteve të organizatave ekonomike që merren me mbrojtjen e interesave të bizneseve, si barriera kryesore e të bërit biznes në Kosovë.
Shumë organizata ekonomike dhe Oda Ekonomike kanë vlerësuar se jostabiliteti i energjisë elektrike ka ndikim negativ edhe në aspektin e tërheqjes së investitorëve të huaj, pasi stabiliteti i furnizimit me energji elektrike është ndër kushtet elementare që duhet t’i ketë një fabrikë prodhuese.
Ndërkaq, është raportuar shpesh se disa fabrika kanë pasur dëme të shumta në aparatura për shkak të ndërprerjes së energjisë elektrike.
Në anën tjetër, përfaqësues të shoqërisë civile thonë se problemi me energjinë elektrike është dashur të eliminohet deri më tani.
Qeveria e Kosovës, kur privatizoi shpërndarjen, e dha me idenë që të eliminohen këto probleme, siç është furnizimi i paqëndrueshëm me energji elektrike, dhe tani kanë kaluar më shumë se katër vite që nga koha e privatizimit të distribucionit dhe gjendja nuk është përmirësuar.
Në bazë të marrëveshjes, rreth 300 milionë euro të taksura nga kompania për investime është dashur të investohen në këtë kohë, dhe jo të lihen sipas kontratës, që është për 15 vite.
Ndryshe, në raportet e deritashme të organizatave ndërkombëtare për sistemin energjetik të Kosovës, vlerësohet se “një pengesë e madhe në rritjen dhe zhvillimin ekonomik të Kosovës është furnizimi joadekuat dhe jo i besueshëm me energji elektrike”.
Shpresa e vetme që Kosova të ketë stabilitet në furnizimin me energji elektrike është ndërtimi i termocentralit “Kosova e Re”, i cili pritet që të fillojë të ndërtohet në vitin e ardhshëm. /tesheshi.com/
