Këshilli i Bashkimit Evropian ka rënë dakord për qëndrimin për anulimin e vizave për qytetarët e Kosovës dhe ende pritet konfirmimi i Parlamentit Evropian që vendimi të jetë përfundimtar.
“Kosova ka bërë përpjekje të mëdha për të përmirësuar sigurinë e saj, menaxhimin e migracionit dhe përafrimin me politikën e vizave të BE-së”, tha ministrja suedeze e migracionit, Maria Malmer.
Kosova është vendi i fundit në Ballkanin Perëndimor, qytetarët e së cilës ende kanë nevojë për viza për të hyrë në BE.
Ministrat e Brendshëm të vendeve anëtare të BE-së kanë miratuar vendimin për heqjen e vizave në lexim të parë dhe tani mbetet konfirmimi i Parlamentit Evropian.
Sistemi i ri elektronik
Vendimi do të hyjë në fuqi kur të hyjë në fuqi Sistemi i ri i Informacionit dhe Autorizimit të Udhëtimit pa viza të BE-së (ETIAS), ose më së voni më 1 janar 2024.
ETIAS është një sistem për regjistrimin e udhëtarëve që hyjnë në BE pa vizë. Qytetarët e këtyre vendeve do të duhet të paraqesin një kërkesë përmes një faqe interneti ose aplikacioni celular përpara se të udhëtojnë në BE dhe të paguajnë një tarifë prej shtatë eurosh.
Miratimi do të jetë i vlefshëm për tre vjet ose deri në skadimin e dokumentit të udhëtimit.
Qytetarët e Kosovës do të mund, sikurse qytetarët e tjerë të vendeve të Ballkanit Perëndimor, të udhëtojnë në BE pa viza dhe të qëndrojnë deri në 90 ditë në çdo periudhë 180 ditore. /tesheshi.com/
