Ministri i Arsimit të Kosovës, Arsim Bajrami është pritur sot në Tiranë nga ministrja e Arsimit të Shqipërisë, Lindita Nikolla. Sipas një komunikate për medie, dy ministrat prezantuan politikat dhe programet e bashkëpunimit mes dy vendeve, në fushën e arsimit të lartë dhe kërkimit shkencor.
Ministrat Bajrami dhe Nikolla gjatë takimit vlerësuan procesin e njohjes së diplomave dhe gradave të fituara në institucionet e arsimit të lartë të vendeve përkatëse.
“Si rezultat i takimeve tona të përbashkëta ne kemi filluar me procesin e njohjes së diplomave të institucioneve të Arsimit të Lartë të Republikës së Shqipërisë. Një praktikë shumë e nevojshme për të mundësuar moblitetin e studentëve. Ky proces do të zhvillohet në bazë të tri kritereve, kriterit të mirëbesimit, kritereve profesionale dhe kritereve të rrjetit NARIC”, ka thënë ministri Bajrami.
Duke folur për punën e komisionit për arsim në finalizimin e Ligjit për profesionet e rregulluara, ministri Bajrami theksoi se vendosja e standardeve sa i përket testit të profesioneve të rregulluara do të bëhet duke respektuar në tërësi autonominë e universiteteve.
“Ne do të respektojmë në plotni autonominë e universiteteve, por është krejtësisht legjitime që Qeveria të kontrollojë shkathtësitë dhe kompetencat që dalin nga universitetet, para se ata të plasohen në tregun e punës”, theksoi ministri Bajrami.
Ndër të tjera, ministri Bajrami, theks të veçantë i kushtoi edhe punës së përbashkët kërkimore shkencore, në mënyrë që studentët nga universitetet e Shqipërisë dhe Kosovës të përfitojnë sa më shumë fonde evropiane përmes projekteve hulumtuese, duke zhvilluar kapacitetet e përbashkëta profesionale për hartimin e projekteve dhe arritjen e rezultateve të suksesshme në aplikimin e tyre në këto fonde. /tesheshi.com/
