Me qëllim luftimit, parandalimit, zbulimit dhe hetimit të veprave penale Inspektorati Policor i Kosovës së bashku me Shërbimet për Çështje të Brendshme dhe Ankesa në Shqipëri kanë lidhur një marrëveshje bashkëpunimi për inspektim të përbashkët.
Në bazë të kësaj marrëveshje të dyja institucionet do t’i kalojnë kufijtë e njëra tjetrës dhe do të përqendrohen në monitorimin e masave për të nxjerrë konkluzione që të ecin më tej.
Kjo marrëveshje po ashtu do t’i mundësoj të dyja vendeve për të përpunuar strategji afatgjata për një bashkëpunim jo vetëm në këtë sektor por edhe në sektore të tjera ku të dy policitë e shteteve kryejnë punë të përbashkëta.
Drejtori i Shërbimeve për Çështje të Brendshme dhe Ankesa të Shqipërisë, Arben Skëndo, tha se kjo marrëveshje do të luftojë krimin e organizuar dhe veprat tjera penale.
Skëndo, gjithashtu tha se inspektimet do të kryhen edhe gjatë sezoneve turistike, kur dihet se fluksi i bashkëkombësve tanë është mjaft i madh në Shqipëri.
Ai kujtoj se kjo punë do të monitorohet për kontrollin e kufijve sipas protokollit të vendeve fqinjë.
Ndërsa, drejtori i Inspektoratit Policor të Kosovës, Fitim Shishani, tha se me këtë bashkëpunim do të krenohen edhe para shumë organizatave ndërkombëtare që Kosova është anëtare.
Pas këtyre inspektimeve në fund të punës dhe agjendës grupi punues do të paraqesë një raport për agjencitë e të dyja vendeve për media dhe për të gjithë. /tesheshi.com/
