Kosova dhe Maqedonia nënshkruan sot në Prishtinë protokollin për krijimin e pikës kufitare në Stançiq, që do të lidhë Anamoravën me Maqedoninë.
Ministri në detyrë i Punëve të Jashtme i Kosovës, Emanuel Demaj, tha se kjo marrëveshje është shumë e rëndësishme pasi mundëson lëvizjen e lirë të qytetarëve të të dyja vendeve.
“Sot është një ditë e veçantë, sidomos për zonën e Anamoravës, pasi është nënshkruar një marrëveshje që hap edhe një derë rreth lëvizjes së lirë e sidomos për ata që jetojnë në këto zona. Kosova ka kryer të gjitha obligimet e saj, sa i përket hapjes së pikës kufitare”, tha Demaj, për mediat.
Edhe zv.ministrja e Punëve të Jashtme e Maqedonisë, Arta Toqi, e vlerësoi këtë marrëveshje si diçka historike.
“Hapja e kësaj pike kufitare është shumë e rëndësishme sa i përket banorëve, pasi do të shkurtojë rrugën 20 deri në 25 kilometra. Shpresojmë në një afat shumë të shkurtër do ta finalizojmë këtë projekt”, tha Toqi. /tesheshi.com/
