Kosova dhe Shqipëria mbesin në listën e 10 vendeve më optimiste në botë, së bashku me shtetet tjera kryesisht në zhvillim si Indonezia, Nigeria, India, Fixhi, Banglladeshi, Vietnami, Filipinet dhe Suedia. Kështu tregojnë të dhënat nga studimi i fundit i “Gallup International”.
Sot, përqindja e kosovarëve që mendojnë se viti 2018 do të jetë më i mirë se viti 2017 është 51%.
Në fakt, krahasuar me tri vitet e fundit, vërehet një ngritje stabile e nivelit të optimizmit të përgjithshëm në Kosovë. Në vitin 2014, kur qytetarët u pyetën nëse mendonin se viti 2015 do të jetë vit më i mirë apo më i keq për Kosovën, vetëm 33% deklaruan se do të jetë më i mirë.
Kjo ishte shkalla më e ultë e optimizmit e shënuar në Kosovën e pasluftës dhe sigurisht se tërë kjo lidhej me krizën qeveritare të atij viti, kur pothuajse për 6 muaj rresht nuk arriti të krijohej qeveria.
Vendet më optimiste në botë janë Nigeria (nota net: +59) dhe Vietnami (nota net: +55) kurse vendet më pesimiste janë: Italia (nota net: -50), Greqia (nota net: -42) e pasuar nga Turqia (nota net: -40). /tesheshi.com/
