Presidentja e Kosovës, Atifete Jahjaga dhe ambasadori i SHBA-ve në Kosovë, Greg Delawie, nënshkruan sot marrëveshjen e ekstradimit midis Kosovës dhe SHBA-ve.
Në një deklaratë të bërë me këtë rast, Jahjaga tha marrëveshja, përpos që shënon një hap të rëndësishëm në thellimin e marrëdhënieve bilaterale me SHBA-të, nënvizon përcaktimin tonë për sundim të rendit dhe ligjit në Kosovë dhe për bashkëpunim të pa rezervë me partnerët tanë në këtë aspekt.
“Deri më tani, përkundër bashkëpunimit të ngushtë me autoritetet amerikane në fushën e sigurisë, mungesa e kësaj marrëveshjeje të ekstradimit ka qenë pengesë ligjore për përmbyllje të suksesshme të rasteve”, ka thënë Jahjaga.
Ajo u shpreh se me këtë marrëveshje të nënshkruar sot Kosova dhe SHBA-të, përpos që forcojnë partneritetin dhe përcaktimin për rend dhe ligj, garantojnë që kriminelët që paraqesin rrezik për rendin dhe sigurinë e qytetarëve të vendeve tona do të ndiqen dhe do të vihen para drejtësisë. /tesheshi.com/
