Për Dejan Bursac, nga Instituti për Studime Politike, frekuenca e shtuar e vizitave në Beograd dhe Prishtinë së fundmi do të thotë se BE-ja dëshiron të arrijë shpejt një sukses në politikën e jashtme.
Problemi i Kosovës përcillet me aktivitet të ngjeshur diplomatik të Perëndimit. Beogradi edhe një herë priti Miroslav Lajçak, përfaqësuesin special të Bashkimit Evropian për dialogun ndërmjet Beogradit dhe Prishtinës. Mediat beogradase i kushtuan shumë rëndësi edhe faktit që Lajçak këtë herë ka ardhur me, siç i cilësojnë mediat, forcat speciale nga Franca dhe Gjermania, Emanuel Bono dhe Jens Pletner.
Futja e “forcave speciale” në lojë lidhet edhe me letrën dërguar presidentit serb Aleksandar Vuçicc nga presidenti francez Macron dhe kancelari gjerman Scholz, në të cilën e ftojnë “të marrë vendime të vështira për Kosovën”. Kjo shihet edhe si një fazë e re në dialogun ndërmjet palës serbe dhe asaj shqiptare, shkruan Deutsche Welle.
Vuçicc: Nuk ka njohje të Kosovës
Në prag të vizitës së Lajçakut, presidenti i Serbisë komentoi deklaratat nga Prishtina për “qeverisjen e atij territori” dhe theksoi se i “paralajmëroi” përfaqësuesit e bashkësisë ndërkombëtare dhe negociatorët dhe pyeti “me çfarë do të vini në Beograd, sepse nuk do ta tolerojmë më? Ne thamë se duhet të respektohen format ndërkombëtare”, tha Vuçiç.
Presidenti i Serbisë ka njoftuar edhe në llogarinë e tij në Instagram para takimit me përfaqësuesit ndërkombëtarë “se nuk do të ketë njohje të Kosovës. Gjithmonë i gatshëm për zgjidhje kompromisi, në përputhje me Kushtetutën e Serbisë dhe rezolutën 1244 të Këshillit të Sigurimit të OKB-së. Nuk dorezohem! Rroftë Serbia”.
Deklaratat pas takimit nuk ishin planifikuar dhe Miroslav Lajçak ka postuar në Twitter pas takimit me Vuçiçin dhe ka thënë se “sot ka pasur diskutime të rëndësishme të detajuara me kryeministrin e Kosovës, Albin Kurti dhe presidentin e Serbisë, Aleksandar Vuçiç, me qëllim për të eksploruar opsionet për përparim në dialog. Procesi do të vazhdojë edhe në ditët në vijim”.
Sukses i shpejtë i politikës së jashtme
Për Dejan Bursac,“kjo po ndodh në një situatë ku fuqia evropiane vihet në pikëpyetje dhe kur, për shkak të krizës në Ukrainë, Evropa është një lloj dëmi kolateral i atij konflikti dhe ekziston një besim i fortë se nuk po merr shumë vendime. Në këtë kuptim, Evropa do të përfitonte nga njëfarë suksesi në negociatat mes Beogradit dhe Prishtinës”.
Jemi të vetëdijshëm se Serbia ka presion që të harmonizojë politikën e saj të jashtme me BE-në, vijon ai dhe shton se “kjo do të nënkuptonte vendosjen e disa llojeve të sanksioneve kundër Rusisë”. “Mund të shohim se ka presion edhe rreth organizimit të Europride, dhe mendoj se në Evropë mendohet se tani mund të merren koncesione nga Serbia nga ndonjë anë. Dhe të krijohet përshtypja se nga të gjitha gjërat, Vuçiç do të ishte më i lehtë për t’i shitur opinionit publik disa koncesione për Kosovën”, beson Bursac.
Vuçiç po kërkon pushim
Dejan Bursac nuk është i sigurt se sa domethënëse do të jetë përfshirja e “forcave speciale” franceze dhe gjermane në negociata dhe thekson se “gjatë viteve të fundit, Franca ka intensifikuar bashkëpunimin e saj me Serbinë, ndërsa Gjermania kryesisht ka qenë në anën e Prishtinës në negociata.”
“Çështja është se sa është Vuçiç i gatshëm të ofrojë lëshime menjëherë në këtë situatë, nëse nomenklatura politike në Gjermani do të ndryshojë – kjo mund të mos jetë në favor të Serbisë, por do të sigurojë disa muaj pushim për qeverinë e Vuçiçit”, vlerëson Bursac.
Nuk vendosni sanksione? Jepeni Kosovën!
Në Serbi ekziston një besim i fortë se kriza e Ukrainës po përdoret në Perëndim për ta detyruar Serbinë të njohë shpejt Kosovën dhe ofensiva aktuale diplomatike nga Brukseli dhe Uashingtoni mund të lexohet në këtë këndvështrim.
Dejan Bursac nuk mendon se “dikush pret që Serbia të shprehë njohjen e Kosovës, por shihet si një lloj tregtie: nëse nuk do të bësh diçka për sanksionet kundër Rusisë, atëherë bëj diçka për atë që ata e quajnë stabilitet rajonal. Por ka edhe diçka që funksionon në favor të palës serbe, e ajo është se pala shqiptare perceptohet si jashtëzakonisht jobashkëpunuese”, thekson Bursac.
Prishtina jobashkëpunuese
Analizat në Beograd pohojnë se ndërmjetësuesit ndërkombëtarë në dialog po rrotullohen në rrathë pikërisht për shkak të mungesës së bashkëpunimit dhe se për këtë e vetmja gjë që u mbetet është të bëjnë presion mbi Beogradin.
Argumenti i palës shqiptare se është kundër Kushtetutës së Kosovës nuk vlen, vlerëson Bursac, “sepse pavarësia e Kosovës është edhe kundër Kushtetutës së Serbisë”.
“Albin Kurti realisht e ka problem, sepse ka ardhur në pushtet në platformën se i intereson vetëm njohja e Kosovës nga Serbia dhe tani nuk mund të devijojë nga kjo. Dhe kjo e vë në pozitë të keqe ndaj ndërmjetësve ndërkombëtarë, të cilët shohin se Kosova nuk ka asnjë fleksibilitet në dialogun ndërmjet Beogradit dhe Prishtinës”. /tesheshi.com/
