Të hënën, Ministri i Jashtëm gjerman Heiko Maas tha se ishte mirë që dialogu midis Serbisë dhe Kosovës ishte riaktivizuar, e njëherësh njoftoi një vizitë në Beograd dhe Prishtinë.
“Eshtë e qartë për mua se duhet të udhëtoj në Serbi dhe Kosovë dhe të dërgoj një sinjal të fortë se dialogu është përparësi për ne,” tha ai gjatë prezantimit të përparësive të presidencës gjermane të Këshillit të BE-së përpara Komitetit të Punëve të Jashtme të Parlamentit Evropian në Bruksel.
Ai deklaroi se kohët e fundit ishte takuar në Berlin me Përfaqësuesin Special të BE-së për Dialogun midis Serbisë dhe Kosovës, Mirosllav Lajçak, dhe theksoi se Gjermania do të qëndrojë e përkushtuar për vazhdimin e dialogut, duke bërë me dije angazhimin e fortë të BE-së në bisedime.
“Këto janë vende që duan një të ardhme evropiane dhe nuk duhet të lejohen të largohen prej nesh, dhe ne e dimë se të tjerët kanë interes të ndikojnë në rajon,” paralajmëroi Maas.
Kreu i diplomacisë gjermane vlerëson se, përveç situatës “të vështirë dhe komplekse”, tani ka një shpërthim të ri të pandemisë së virusit koronar në rajon.
Maas deklaroi se Gjermania do të përpiqet të hap negociatat e pranimit me Maqedoninë Veriore deri në fund të presidencës së saj të BE-së, deri në fund të vitit, por ai shprehu dyshimin se e njëjta do të ishte e mundur me Shqipërinë.
Kujtojmë se kjo vizitë e kreut të diplomacisë gjermane në Prishtinë e Beograd, është dhe konfrmim i një revanshi gjerman për të mos e lënë SHBA që të diktojë mbi fatin e rajonit.
Aktivizimi i fortë i boshtit franko-gjerman në riaktivizimin e dialogut Prishtinë – Beograd, ku Merkel e Macron u angazhuan personalisht për të ulur sërish palët në bisedime (Hoti dhe Vuciç), është konfirmim i një binomi të ri që do tentojë të rishkruajë historinë e BE, tashmë dhe përballë vizionit amerikan me Trump-in nga pas. /tesheshi.com/
