Projektligji nr. 05/L-096 për parandalimin e pastrimit të parave dhe luftimin e financimit të terrorizmit, ka marrë miratimin e deputetëve të kuvendit të Kosovës, sot, pas shqyrtimit të tij për herë të dytë.
Për miratimin e tij votuan 58 deputetë, 7 abstenuan, ndërsa nuk pati asnjë kundër.
Vërejtje pati sa i përket mospërputhjes së këtij ligji me legjislacionin e BE-së.
Kryetari i komisionit për buxhet dhe financa, Naser Osmani, kërkoi që ky projektligji të plotësohet pas hyrjes në fuqi. Në këtë kontekst ai i rekomandoi Ministrisë së Financave të rishikojë këtë ligj.
Presidenti i Kosovës, Hashim Thaçi, ka përshëndetur vendimin e kuvendit për votimin e projektligjit për luftimin e financimit të terrorizmit.
Ai tha se Kosova ka miratuar ligjin që synon parandalimin e qytetarëve të Kosovë që t’u bashkohen luftërave të huaja dhe strategjinë për parandalimin e ekstremizmit të dhunshëm dhe radikalizmit që shpie në terrorizëm.
“Ndërkaq, fakti që në gjashtë muajt e fundit nuk është regjistruar asnjë kosovar të ketë shkuar të marrë pjesë në luftëra të huaja përbën sukseset e para të angazhimit tonë të përbashkët. Njëherësh, mbetemi të përkushtuar që të punojmë në deradikalizimin dhe riintegrimin e ish-luftëtarëve të huaj nga Kosova.
Kosova vazhdon të jetë e vendosur dhe kampione në luftën kundër ekstremizmit dhe terrorizmit ”, ka thënë Thaçi. /tesheshi.com/
