Nga Blendi Gashi
Pavarësisht problemeve të shumta si papunësia, varfëria, izolimi, kosovarët po festojnë përvjetorin e 9-të të Pavarësisë, ndonëse jo të zjarrtë si dy-tri vitet pas shpalljes.
Nuk ka dyshim se kjo është dita më e madhe e Kosovës, sublimimi i ëndrrave dhe flijimeve të brezave të tërë.
Por po ashtu nuk ka fije dyshimi se ky përvjetor është më i mangët krahasuar me të tjerët. Arsyeja është pamundësia e disa ish-komandantëve të Ushtrisë Çlirimtare të Kosovës për ta festuar atë, ndonëse rrezikuan edhe jetën për një ditë si kjo.
Dhe padyshim, mosprania e ish-komandantit të Dukagjinit, Ramush Haradinaj i cili po mbahet në Francë me një fletë-arrest të Serbisë e zbeh jashtëzakonisht shumë këtë përvjetor.
Familja Haradinaj për të gëzuar këtë ditë shqiptarët dha dy djemtë e saj Luanin e Shkëlzenin.
Ramushi dhe kontributi i familjes Haradinaj, por edhe i familjes Jashari nga Prekazi u harruan tërësisht në këtë përvjetor, pasi krerëve të shtetit nuk iu ra ndërmend të thonë asnjë fjalë të vetme për ta (përjashto kryeministrin Mustafa që përmendi komandantin Adem Jashari).
Por jo vetëm Ramushit i pamundësohet që me familjen e tij dhe qytetarët ta festojë Ditën e Pavarësisë.
Pjesë e festimeve nuk janë as dy ish-komandantët nga Drenica, Sami Lushtaku dhe Sylejman Selimi, të cilët janë dënuar me disa vite burg për kinse gjoja krime lufte.
Edhe për këto dy familje që dhanë shumë për çlirimin e vendit, ky 17 shkurt është jo festiv, dhe sigurisht i ftohtë pasi u mungojnë më të dashurit e tyre.
Se festimi i pavarësisë pa Ramushin është i mangët e tha dje edhe kryeministri i Shqipërisë Edi Rama, pas një fjale rasti që mbajti para medieve pas përfundimit të seancës solemne.
“Ky është një moment i rëndësishëm shpallja e pavarësisë. Çdo përvjetor me një peshë të jashtëzakonshme sepse janë të freskëta ditët e vështira. Uroj përsëri kthimin sa më parë të Ramush Haradinajt. Pa pranin e tij kjo ditë ka një mungesë, kjo është një ftesë për të gjithë duke u bërë të gjithë së bashku”, tha Rama.
Për dallim nga kryeministri shqiptar asnjë fjalë për ish-komandatët, Haradinaj, Selimi e Lushtaku që për shkak të përballjes me drejtësinë nuk do jenë pjesë e festimeve, nuk e thanë presidenti Thaçi, kryeminsitri Mustafa (të paktën për Ramushin), e as kryekuvendari Veseli.
Kjo ka bërë që të plasin jo pak reagime jo vetëm nga AAK-ja por edhe nga vet PDK-ja.
Shefi i grupit parlamentar të AAK-së, Pal Lekaj thotë se udhëheqësit e shtetit nuk janë treguar të tillë, por janë sillur si protektorë.
“Juve sot nuk ua zuri goja emrin e njeriut që e hapi Kosovën ndaj perëndimit, i cili dha dorëheqjen nga pozita e kryeministrit për t’u përballur me padrejtësitë e montuara, vetëm për të ekzistuar kjo pavarësi dhe edhe sot po sakrifikon e po pengohet padrejtësisht. Ju sot nuk ishit udhëheqës të shtetit të Kosovës, të shtetit të Ramushit. Ju sot u sollët si protektorë”, ka reaguar Lekaj.
Ish-komandatët me rastin e përvjetorit i ka kujtuar edhe deputetja e PDK-së Ganimete Musliu, duke ja tërhequr vërejetjen krerëve të shtetit për mos përmendjen e kontributit të tyre.
“Sot në vigjile të 9 vjetorit të Pavaresise së Kosoves, përveç tregimeve për heronjtë, dëshmorët, martirët, flamurin, shtetin dhe lirinë, fëmijve tanë duhet të ju tregohet edhe për shume burra që edhe sot po e paguajnë shtrenjtë çmimin e lirisë dhe shtetësisë së Kosovës! Në Francë, Dyz, Dubravë e Lipian është një pjesë e rëndësishme e tregimeve të historisë së Kosovës, janë shumë burra që padrejtësisht u mohohet liria. Sylejman Selim, SamiLushtaku, RamushHaradinaj, VëllezëritDemaku dhe ju pjesëtarë tjerë të UÇK-së, emrat e juaj janë vula e shtetit tonë!”, ka shkruar në Facebook, deputetja Musliu. /tesheshi.com/
