Korrja e qindra rrënjëve kanabis që policia i raporton rregullisht çdo mëngjes me anë të komunikatave të saj tashmë të shndërruara në rutinë, porsi lajmet e TVSH-së diku me “një palestinez të vrarë e dhjetra të plagosur pas përplasjes me ushtrinë izraelite”, përbën për qeverinë shqiptare treguesin kokëfortë sipas saj, se lufta kundër drogës po zhvillohet e pakompromis. Madje ka një argument në këtë mes: policia pretendon se ajo po e dëmton deri diku veten me transparencën e saj në sferën e perceptimit publik, pasi thotë se dikur as që raportohej për aksione të tilla, edhe nëse zhvilloheshin.
Por në këto aksione ka diçka që nuk shkon dhe që është po aq transparente: policia raporton vetëm procesin e korrjeve, kur dihet se droga është një proces kompleks, me një zinxhir faktorësh që e mbajnë në këmbë tregun e saj. Më saktë, ka një dispropocion mes rrënjëve të shkulura dhe mungesës së pronarëve të tyre të arrestuar e të dënuar më pas. Ndërkaq, kur është fjala për pronarë, lista e tyre nis nga kokat që i përkasin metropoleve, e që mund të jenë deri në krye të punëve të këtij vendi, e deri tek ai punëtori i thjeshtë me mëditje, i cili i bie shatit për të fituar diçka. Dhe në këtë zinxhir pronarësh, është e habitshme moskapja e asnjë hallke.
Vetë kryeministri Rama, teksa ka folur e flet për Lazaratin, ka thënë e thotë se me paranë që dilte prej aty nga kultivimi i drogës, ushqeheshin deri dhe media në Tiranë. Por siç e dimë tashmë, “peshku më i madh” i kapur në kuadër të Lazaratit është Gate Mahmutaj, një trafikant krejt ordiner, një “cironkë” e papërfillshme e atij kombinati gjigand droge që niste nga Lazarati e nuk dihej ku përfundonte, e ku Gatja ngjante aty si një biçim roje.
Dhe gjersa nuk u kap askush prej atyre që drejtonin atë kombinat, normalisht që ai do vijionte të funksiononte (siç) në trajta krejt të tjera e po me të njëjtën linjë prodhimi.
Sepse shtrohen disa pyetje dilematike: përse nuk ka ndodhur asnjëherë që policia të kapë ndonjë kultivues, punëtor të thjeshtë, në çastin kur po hedh farën në tokë? Ose duke ujitur? Përse pra mungojnë të kapur apo të arrestuar të cilët mund të t’i përkasin proceseve të ndryshme të kultivimit?
Nuk do mend fakti se kjo nuk është vetëm e punë e policisë, por dhe më së shumti punë e shërbimeve inteligjente. Përse këto të fundit arrijnë të gjurmojnë e zbulojnë çdo “element ekstremist” që ka lidhje me Sirinë, por që nuk arritkan të evidentojnë asnjë individ të përfshirë në kultivim e trafik droge, që për më tepër zhvillohet ditën për diell?
Policia nuk është thjesht për të korrur. Madje do ishte më mirë që kjo punë t’i lihej ushtrisë, që, siç pastron territorin nga plehrat në periudha vale turistike, të mund të pastrojë dhe pllajat, gërxhet e mejet nga bima që po na merr në qafë si vend, si popull, si ardhmëri.
Ndërsa policia, të lërë kosën e t’i futet asaj që më së shumti e tregon profesionale, punës operative, për të kapur të paktën atë fshatarin e punës së krahut, nëpërmjet së cilit të gjendet se kush e urdhëroi ta bëjë atë punë e se në ç’bordero firmos. Përndryshe, e gjitha është një film…që ta shpif! /tesheshi.com/
