Nga Blendi Gashi
Partitë opozitare në Kosovë janë në “luftë” se kush duhet t’i prijë por edhe të jetë pjesë e listës eventuale të përbashkët zgjedhore.
Formimi i kësaj liste ka bërë që opozita e bashkuar kohëve të fundit të ketë çarje, pasi nuk po e kanë të lehtë të gjejnë gjuhë të përbashkët për emrat që do t’i vendosin në listë.
Një ndër problemet kryesore raportohet se është inkuadrimi i pjesëtarëve të shoqërisë civile që shihet si një ‘vlerë’ e shtuar në listën opozitare, me qëllim të vetëm mposhtjen e pushtetit aktual.
Por, nëse kihet parasysh një anketë e realizuar së fundmi nga Programi i Kombeve të Bashkuara për Zhvillim dhe Agjencia e Shteteve të Bashkuara për Zhvillim Ndërkombëtar me temë “Perceptimet e Shoqërisë Civile në Kosovë”, ku tregon se korrupsioni nuk është i pranishëm vetëm në institucionet shtetërore të Kosovës, por edhe tek shoqëria civile, atëherë opozitarët duhet të kenë kujdes të shtuar se kënd po e marrin afër vetës.
18% e të anketuarëve mendojnë se korrupsioni në shoqërinë civile është në rritje në shkallë të lartë, ndërsa 22% mendojnë se është në shkallë të mesme, kurse 61% e tyre nuk u besojnë OJQ-ve.
Nga respodentët e anketuar del se 10% prej tyre mendojnë se OJQ shërben si fillim për hyrje në politikë, ndërsa në punën e shoqërisë civile kanë besim 49 %, kurse 61% e tyre nuk u besojnë OJQ-ve.
Duke pasur parasysh këtë fakt dhe në asnjë moment duke mos paragjykuar se kush mund të jenë personat nga shoqëria civile që mund t’i bashkohen listës opozitare, shtrohet pyetja se sa mund të jenë kredibil personat e ashtuquajtur ‘të pavarur’ dhe cili është roli i tyre në shoqëri ?
Për partitë, do të ishte bumerang nëse në listë zgjedhore fusin njerëz të inkriminuar
Njohësi i rrethanave politike në Kosovë, Mazllum Baraliu, duke komentuar raportin për shoqërinë civile në Kosovë ku vlerësohet e korruptuar, thotë se mund të jetë përceptim sepse nuk ka ndonjë analizë afatgjate të gjendjes dhe indikatorëve që tregojnë qartë se në çfarë mase dhe është apo jo shoqëria civile e korruptuar.
Baraliu thotë se shoqëria civile është një vlerë e jashtëzakonshme e një shoqërie nëse punohet si duhet dhe në kuadër të kornizave ligjore dhe komponente e rëndësishme e demokracisë.
I pyetur se pse duhet të shihen si vlerë e shtuar nga opozita pjesëtarët e shoqërisë civile, Baraliu thotë se interes dhe qëllim i partive politike është të fusin në listat e tyre zgjedhore pjesëtarë të shoqërisë civile që kanë integritet dhe sjellin vota.
“Do të ishte bumerang për partitë nëse fusin në listën zgjedhore njerëz të inkriminuar. Nëse opozita e fut ndonjë person nga shoqëria civile në listë llogarit se mund të ketë dobi, autoritet ai/ajo dhe të fitoj vota.
Do të ishte vlerë shtesë qoftë e pozitës ose e opozitës, sidomos e kësaj të fundit nëse shoqëria civile kyçet në një aktivitet i cili pretendohet demokratik i lejuar, legal dhe i dobishëm.”, thotë Baraliu, përtesheshi.com.
Megjithatë, Baraliu shton se në relacion me subjektet politike, lista e shoqërisë civile nuk do të jetë një listë e mirëfilltë por margjinale, pra, do pritet të ketë shumë më pak përfaqësues të shoqërisë civile në listë se anëtarë të partive.
Qëllimi i shumë OJQ-ve, peshkimi i fondeve
Leon Duhanaj, nga organizata Forca e Diasporës për Atdheun (FDA), njëherit analist politik, nuk e mohon faktin se shumë organizata joqeveritare janë të orientuara drejtë peshkimit të fondeve dhe nuk kursejnë as imazhin e vendit për qëllimet e veta personale, por shton se nuk duhet futur të gjitha në një thes.
Sipas tij, jo rrallë ndodhë që luftën kundrejt politikës, shoqëria civile ta shfrytëzon si trampolinë drejtë sistemimit në politikë, respektivisht përfitimit të posteve politike.
“Në kushte normale shoqëria civile bën politikë por jashtë subjeteve politike, duke e ndikuar edukimin e subjekteve politike. Në kontekstin tonë nuk është diçka në rregull sepse shoqëria civile ose vërehet çartë se është instrument i ndonjë partie ose e tradhëton pozicionin e të qenurit shoqëri civile duke u pozicionuar nëpër subjekte politike. Çka është më e keqja se shumë shpesh edhe pas aderimit në parti të ndryshme dhe kur nuk kanë sukses të njëjtit i ruajnë pozitat e mëparshme në në organizatat e tyre, gjë që i bën të ngjajshme me politikanët aktiv”, thotë Duhanaj, për tesheshi.com.
Ndryshe, zëdhënësi i Aleancës për Ardhmërinë e Kosovës, Muharrem Nitaj, përmes një postimi bërë në Facebook ka thënë se partia e tyre ka bërë një propozim se në rast të dakordimit të një liste të përbashkët me Vetëvendosje-n dhe NISMA-n, të paktën 10 emra të jenë nga shoqëria civile, por që nuk ka treguar se kush mund të jenë. /tesheshi.com/
