Nga Blendi Gashi
Brenda pak ditësh, në Kosovë ndërkombëtarët kanë dhënë qëndrime të kundërta sa i përket luftimit të korrupsionit.
Ndërsa përfaqësuesja e Bashkimit Evropian, Federica Mogherini, gjatë konferencës së përbashkët me kryeministrin Mustafa, tha se “është shënuar progres në luftën kundër korrupsionit”, një qëndrim krejtësisht tjetër për çështjen në fjalë vjen nga Departamenti Amerikan i Shtetit.
Zyra për Demokraci, të Drejta të Njeriut dhe Punë e SHBA-ve në raportin e saj të përvitshëm për të drejtat e njeriut në vendet e botës ka përmendur si problem kryesor korrupsioni qeveritar dhe atë në sektorin privat, si dhe mosndëshkimin e këtyre veprave të korrupsionit.
“Ndonëse ligji parasheh ndëshkime penale për korrupsion nga ana e zyrtarëve, qeveria nuk ka zbatuar ligjin si duhet. Përveç kësaj, mungesa e mbikëqyrjes efektive gjyqësore dhe dobësia e përgjithshme në sundimin e ligjit ka kontribuuar dukshëm në këtë problem”, thuhet në raport.
Duke parë këto deklarata kontradiktore shtrohet pyetja, ka rënie apo jo të korrupsionit?
Opozitarë, organizata qeveritare dhe drejtues mediash japin qëndrime kundër Mogherinit duke thënë se korrupsioni vazhdon të hedh valle në vend.
Sekretari organizativ i Vetëvendosje-s, Dardan Molliqaj, ka ironizuar me Mogherinin duke shtruar pyetjen se “kur qenka përmbushë kriteri për luftimin e korrupsionit!?”, pasi është parë një prej kritereve kyçe për ratifikimin e Demarkacionit me Malin e Zi.
Molliqaj, përmend disa raste kur Prokuroria hesht ndaj politikanëve në pushtet që dyshohen për vepra korruptive.
“Kryeministri ende vazhdon me ju jep tenderë djemve të tij. Mbi 60 dosje në prokurori për korrupsionin e qeverisjes së kryeministrit aktual në Komunën e Prishtinës asnjëherë nuk u trajtuan. Adem Grabovci, edhe pse ka qindra fakte për krim e korrupsion, ende është i lirë. Policia është e kriminalizuar dhe e kapur nga pushtetarët kriminelë. Gjykatat poashtu. Për tu punësuar në institucione publike, kusht është afërsia me partitë në pushtet
E Mogherini vjen e na thotë korrupsioni po luftohet, nëse doni liberalizim të vizave duhet t’i falni edhe 8000 hektarë tokë. Jo faleminderit! Nuk kemi tokë për të falur!”, ka thënë Molliqaj.
Deklarata e Mogherinit në kundërshtim me qëndrimin e Apostolovas
Ehat Miftaraj, nga Instituti i Kosovës për Drejtësi (IKD), thotë se deklarata Mogherinit lidhur me progresin në luftën kundër korrupsionit duhet shikuar më shumë në kontestin politik dhe në rrethanat në të cilat është duke kaluar aktualisht vendi, si dhe një presion publik ndaj deputetëve lidhur me Demarkacionin.
Sipas tij, deklaratat e Mogherinit bie në kundërshtim me deklaratat e dhëna në një tryeze publike një ditë më herët nga vet përfaqësuesja e BE-së në Kosovë, Nataliya Apostolova, e cila përdori fjalor të ashpër lidhur me mungesën e rezultateve në luftën kundër korrupsionit.
Miftaraj, tregon se gjetjet e vazhdueshme dëshmojnë se nuk ka luftë të vërtetë kundër korrupsionit, por ka spektakël përmes të cilit akterët e sistemit të drejtësisë dhe politika po mundohen t’i shesin si rezultate konkrete.
“Ende ekziston një numër minimal i rasteve të profilit të lartë që akuzohen për korrupsion, ndërsa në burg nuk kemi ende profil të tillë. Burgjet ende mbipopullohen me persona që janë të dënuar për vepra tjera apo korrupsion të imtë, po me persona që e kanë kapur shtetin përmes keqpërdprimit të detyrës. Ende nuk ka aktgjykime përfundimtare për ndonjë profil të lartë të korrupsionit. Ajo që IKD ka gjetur është shqetësuese, sepse shumica e aktakuzave bombastike po rrëzohen edhe në fillim të proceseve në gjykata. Kjo më shumë ngjan në persekutim të individëve për t’i bërë kurban të liberalizimit të vizave sesa si luftë e vërtetë kundër korrupsionit”, thotë Miftaraj, për tesheshi. com.
Mogherini nuk jeton në Kosovë, nuk e ndjen krimin
Flaka Surroi, drejtoreshë e grupit medial “Koha”, poashtu nuk pajtohet me deklarimet e Mogherinit, për korrupsionin.
“Mogherini nuk jeton në Kosovë dhe nuk i ndien pasojat e krimit dhe korrupsionit këtu. Nuk e di, apo nuk do ta dijë, se në Kosovë nuk vjen asnjë investitor i huaj; se punësimi rritet duke iu falënderuar matematikave të Agjencisë së Statistikave; se krimi e korrupsioni “luftohen” me parashkrimin e ndjekjeve penale dhe me përfundimin e lëndëve me dënim për mitmarrje në vlerë prej 50 eurove. Nëse BE-ja e vlerëson këtë situatë si progres, atëherë shumë thjesht ka mundur të mos e vendosë atë si kusht fare!”, ka shkruar në Facebook, Surroi. /tesheshi.com/
