Nga Blendi Gashi
Gjykatat kosovare vazhdojnë t’i amnistojnë “peshqit e mëdhenj të korrupsionit”, pavarësisht se ky fenomen negativ ka ‘lëshuar rrënjë’ në vendin tonë.
Politikanë dhe afaristë të profilit të lartë, që nga paslufta në vazhdimësi kanë grumbulluar pasurinë e tyre përmes krimit dhe korrupsionit por përkundër kësaj janë imunë nga drejtësia.
Rezultatet e luftës ndaj korrupsionit vazhdojnë të jenë në nivel të dobët, pavarësisht se prokurorët vendorë pohojnë se i kanë përfunduar mbi 50 për qind të rasteve të korrupsionit që i kanë pasur në duar.
Por problem qëndron se nga ky numër nuk ka raste të profilit të lartë që janë hetuar apo që akuzohen për korrupsion e aq më pak aktgjykime nga gjykatat në lidhje me rastet e korrupsionit.
Sistemi i drejtësisë në Kosovë, në vazhdimësi është kritikuar edhe nga organizatat vendore dhe ndërkombëtare, si një nga sistemet me probleme të shumta në funksionim, përfshirë këtu edhe dukurinë e korrupsionit.
Deputet të partive opozitare dhe profesor të juridikut thonë se shteti ka dështuar të kap personat e profilit të lartë që dyshohen se kanë kryer vepra korruptive, por krejt çfarë bën është ndjekja penale e qytetarëve të rëndomtë.
Opozita: Lumezi duke burgosur opozitën konsideron se po e forcon sistemin e drejtësisë
Deputetja e Lëvizjes Vetëvendosje Albulena Haxhiu thotë se për shkak të ndikimeve politike në sistemin e drejtësisë, sot janë më qindra raste të krimit të organizuar dhe korrupsionit, të pushtetarëve por edhe familjarëve të tyre, strukturave kriminale në veri e të tjera dhe sistemi i drejtwsisë qëndron i heshtur përball tyre.
Depuetja e VV-së ka kritika për kryeprokurorin e Shtetit Aleksandër Lumezi për të cilin thotë se duke e luftuar e burgosur opozitën dhe aktivistët e saj konsideron se po e forcon sistemin e drejtësisë, derisa në anën tjetër nuk ka asnjë veprim për të hetuar Shërbimin Informativ të Kosovës (SHIK) që e kishte udhëhequr për disa vite kryekuvendari Kadri Veseli.
“Aktualisht sistemi i drejtësisë është shndërruar në gardian të pushtetit jokushtetues të Isa Mustafës.
Rasti i Zemajt poashtu e shpërfaq qasjen e njëanshme të sistemit të drejtësisë, për sa kohë u arrestuan më shumë se gjysma e deputetëve të opozitës, nuk kemi asnjë masë që është ndërmarrë kundrejt tij, ndonëse ka rrezikuar jetën e deputetëve të Vetëvendosje-s”, thotë Haxhiu për tesheshi.com.
Sistemi i drejtësisë në vend ka nevojë për transformim shton deputetja Haxhiu, e cila pohon se një gjë e tillë është e pamundur të bëhet me njerëz që abuzojnë me shtetin, territorin e paranë publike.
Sipas Haxhiut, transformimi i sistemit të drejtësisë në vend mund të arrihet vetëm kur në krye të institucioneve të shtetit vijnë njerëz të dijshëm, guximshëm dhe të vullnetshëm.
Smaka: Prokuroria e Shtetit dhe Këshilli Prokurorial kanë dështuar
Profesori i Fakultetit Juridik, Riza Smaka, njëherit udhëheqës i Departamentit për Drejtësi në Aleancën për Ardhmërinë e Kosovës (AAK) kritikon tej ashpër institucionet e sistemit të drejtësisë si Prokurorinë e Shtetit, Këshillin Prokurorial të Kosovës për të cilat thotë se nuk kanë bërë asgjë në për të vënë para drejtësisë ‘peshqit e mëdhenj’.
“Këto dy institucione nuk kanë qenë as për së afërmi në nivelin e përfilljes së dispozitave të neneve 108 dhe 109 të Kushtetutës ngase një numër i konsideruar i kryesve të akteve të inkriminuara si dhe skandaleve publike antiligjore persekutuar dot veçanërisht jo ato të kryesve të krimeve nga persona të profileve qeveritare e politike të lartë!”, thotë Smaka për tesheshi.com.
Sipas profesor Smakës, ndjekja penale e kryesve të vegjël të akteve të inkriminuara do të justifikohej sikundër e njëjta të bëhej edhe kundër funksionarëve të lartë publikë dhe të personave në kooperim të të njëjtët!
“Sikundër dihet publikisht , një numër i konsideruar i lëndëve penale dhe i skandaleve ilegale të kryera nga persona influent në shtet, janë absolvuar kundërligjshëm, ndër të tjera në shoqërinë politike kosovare , ndërkohë, në vend të persekutimit konsekuent, janë absolvuar kundërligjshëm edhe nëpërmjet zhdukjeve fizike si dhe parashkrimeve juridike të rasteve të tilla. Në anën tjetër nuk dihet madje as një rast që kundër parashkruesve dhe zhduksëve të qëllimit të lëndëve penale të jetë ndërmarrë ndonjë masë juridike!”, thotë Smaka.
Ndryshe, një hulumtim i fundit nga Instituti i Kosovës për Drejtësi, thotë se “vet fakti se edhe në vitin 2015, ka lëndë që ende nuk janë zgjidhur nga prokuroritë dhe që datojnë nga viti 2001 deri në vitin 2013, dëshmon se prokuroritë edhe prokurorët nuk e kanë shqyrtuar seriozisht planin e veprimit”. /tesheshi.com/
