Nxehtësia rekord po godet në mbarë botën, nga Shtetet e Bashkuara, ku dhjetëra miliona njerëz po përballen me temperatura të larta të rrezikshme, deri në Evropë dhe Japoni, shembulli më i fundit i kërcënimit të ngrohjes globale.
Italia përballet me temperatura maksimale për fundjavën, me Ministrinë e Shëndetësisë që ka lëshuar një alarm të kuq për 16 qytete, përfshirë Romën, Bolonjën dhe Firencen.
Meteocenter ka paralajmëruar italianët që të përgatiten për “valën më intensive të të nxehtit këtë verë dhe një nga më intensivet e të gjitha kohërave”, shkruan AFP.
Mërkuri mund të arrijë 40 gradë Celsius në Romë deri të hënën dhe deri në 43 gradë të martën, duke thyer rekordin prej 40.5 gradë në gusht 2007.
Ishujt e Siçilisë dhe Sardenjës mund të përballen me temperatura deri në 48 gradë, paralajmëroi Agjencia Evropiane Meteorologjike – “potencialisht temperaturat më të nxehta të regjistruara ndonjëherë në Evropë”.
Edhe Greqia po përballet me vapë të padurueshme.
Qyteti qendror i Tebës regjistroi një temperaturë prej 44.2 gradë të premten.
Akropoli, atraksioni më i madh turistik i Athinës, u mbyll për të dytën ditë radhazi të shtunën me temperaturat që priten të arrijnë në 41 gradë, ashtu si edhe disa parqe në kryeqytetin grek.
Qasja në sitin arkeologjik të listuar në UNESCO që daton nga antikiteti është pezulluar nga mesdita deri në mbrëmjen e hershme “për të mbrojtur punëtorët dhe vizitorët”, tha Ministria greke e Kulturës.
Regjionet e Francës, Gjermanisë, Spanjës dhe Polonisë po përballen gjithashtu me temperatura të larta.
Pjesë të Japonisë lindore pritet gjithashtu të arrijnë temperaturat prej 38 deri në 39 gradë të dielën dhe të hënën, me agjencinë e motit që paralajmëron se temperaturat mund të arrijnë rekordet e mëparshme.
Përmbytjet dhe rrëshqitjet e dheut
Shirat e musonit kanë marrë të paktën 90 jetë në Indinë veriore, pas vapës së fortë. Lumi Yamuna që rrjedh nëpër kryeqytetin New Delhi ka arritur një rekord të lartë, duke kërcënuar lagjet e ulëta në megalopol me më shumë se 20 milionë banorë.
Përmbytjet e mëdha dhe rrëshqitjet e dheut janë të zakonshme gjatë musoneve të Indisë, por ekspertët thonë se ndryshimi i klimës po rrit shpeshtësinë e tyre.
Amerikanët po përballen me një valë të nxehti nga Kalifornia në Teksas, me kulmin që pritet këtë fundjavë.
Një valë të nxehti ka përfshirë shtetet jugperëndimore gjatë gjithë javës, duke shkaktuar rreziqe serioze për shëndetin.
Në Arizona, një nga shtetet më të goditura, banorët po përballen çdo ditë me një valë të nxehti.
Kryeqyteti i shtetit, Phoenix, regjistroi ditën e tij të pesëmbëdhjetë radhazi mbi 43 gradë të premten, tha Shërbimi Kombëtar i Motit.
Valët e të nxehtit vijnë pasi mbikëqyrësi i klimës i BE-së tha se bota pati qershorin më të nxehtë të regjistruar në muajin e kaluar. /tesheshi.com/
]
