Presidenti Hashim Thaçi javët e fundit në çdo deklaratë publike flet për korrigjimin e kufirit me Serbinë, ide që ka ngjallur polemika të mëdha jo vetëm tek politika e Prishtinës por edhe më gjërë.
Ai edhe sot përmes një postimi në Twitter ka mbrojtur idenë po vazhdon ta mbrojë idenë në fjalë.
“Nuk ka ndarje përgjatë vijave etnike, por po në rregullimin e kufirit dhe njohjen reciproke”, shkruan Thaçi.
Por presidenti vetëm katër muaj më parë ishte kundër korrigjimit të kufirit me Serbinë, saktësisht para katër muajsh e quante opsion të rrezikshëm.
“Korrektimi i kufijve e kam thënë disa herë që është një opsion i cili bart me vete shumë rreziqe, të cilat ne të gjithë i dimë, prandaj nuk dua të futem fare në detaje”, deklaroi Thaçi në konferencën e mbajtur më 5 prill, ku ishin prezantuar skenarët e “Finales së madhe” në dialog me Serbinë bazuar në analizën e Institutit Kërkimor për Çështje Evropiane dhe të Zhvillimit (RIDEA), dhe Grupit për Hulumtim të Politikave në Ballkan (BPRG).
Thaçi edhe para përfaqësuesve të Luginës deklaroi se Kosova i ka bërë të gjitha kompromiset e dhimbshme deri më tani nëpërmjet Planit Gjithëpërfshirës të presidentit Marti Ahtisaari.
Duke parë konferencat e njëpasnjëshme të thirrura nga Thaçi sidomos javën e kaluar, shtrohet pyetja: pse ka ndryshuar Thaçi qëndrimin brenda pak muajsh ?
Sigurisht këtë vetëm ai mund ta dijë. Por duke pasur për bazë deklarimin kundërshtues të para katër muajsh lë të kuptohet se sikur Thaçit i është prezantuar kjo ide në tavolinën e Brukselit, apo thënë më mirë opsioni final që duhet ta pranoi për të arritur siç thuhet marrëveshjen finale me Serbinë.
Duke folur për këtë të fundit Thaçi deklaroi para katër muajsh se “BE-ja dhe SHBA-të do të duhej të jenë garantues jo vetëm në arritjen e marrëveshjes midis Kosovës dhe Serbisë, por edhe në zbatimin e saj me afate shumë konkrete kohore”.
Kujtojmë se ideja e shkëmbimit të territoreve, në po të njëjtën konferencë u kundërshtua edhe nga përfaqësues të Luginës së Preshevës. /tesheshi.com/
