Kryeministri Kurti shkarkoi një prej ministrave të tij të ardhur nga partneri në koalicion LDK, në pretendimin se përhapi panik nëpërmjet një fraze gjatë një interviste televizive.
“Në Kosovë situata është serioze se numri po rritet nga ora në orë”, tha Agim Veliu, ministër i Punëve të Brendshme dhe Administratës Publike, i cili sigurisht që s’është më i tillë.
Kjo ka çuar në reagimin e ashpër të të shkarkuarit, i cili e ka quajtur ish-eprorin e tij si “tinzar”.
“Ky është një veprim tinëzar i tij siç di me bër ai. Ai nuk ka guxim të marrë vendime për Kosovën si për gjendjen ekzistuese politike dhe atë epidemiologjike. Kjo sikurse është tarifa që duhet të largohet menjëherë, ashtu duhet të marrë të gjitha masat për të mbrojtur Kosovën nga koronavirusi. Kosova nuk ka asnjë dëm nga unë”, tha Veliu.
Ka reaguar gjithashtu dhe Isa Mustafa, duke dhënë sinjalin se ky akt i Kurtit mund të çojë në çarjen e thellë të koalicionit.
“Për mua dhe LDK-në është i papranueshëm shkarkimi i Ministrit të Punëve të Brendshme dhe Administratës Publike, z. Agim Veliu.
Kjo është shkelje e Marrëveshjes së koalicionit.
Me marrëveshje kemi përcaktuar se ministrat mund të shkarkohen nga Kryeministri në konsultim me Kryetarin e subjektit politik me të cilin është bërë koalicioni, bazuar në një arsyetim që e pranon Kryetari i LDK-së.
Si kryetar i LDK-së nuk jam konsultuar nga Kryeministri dhe aq më pak i pranoj arsyet e tij te bëra publike.
Kërkoj nga Kryeministri të anuloj vendimin për shkarkimin e z. Veliu dhe të merr vendim per heqjen e taksës deri në fund të javës.
Veprimet e njëanshme të Kryeministrit janë të dëmshme dhe të papranueshme dhe qojnë në prishje të koalicionit”, shkroi Mustafa në FB. /tesheshi.com/
