Ngjashëm si në ditët e para të tërmetit, kreu demokrat Basha i është shmangur çdo politizimi të situatës pas mbërritjes së rasteve të para me koronavirus dhe në Shqipëri.
“Asnjë vend nuk është imun ndaj rrezikut të koronavirusit, dhe tani që kemi rastet e para të konfirmuara edhe në Shqipëri, është më e rëndësishme se kurrë që të gjithë të reagojmë me kujdes dhe me përgjegjshmëri”, shkruan Basha në të parin reagim.
Ai fton për kujdes e mospërhapje paniku në këtë situatë.
“Të gjithëve do na duhet të bëjmë sakrifica në mënyrë që të luftojmë përhapjen e virusit: të kujdesemi shumë për higjenën tonë personale, të kufizojmë udhëtimet dhe nëse nuk ndihemi mirë të rrimë në shtëpi.
Sot nuk është koha për panik, por për masa të shpejta dhe të vendosura”, shprehet njeriu që drejton opozitën shqiptare. /tesheshi.com/
