Presidenti amerikan Donald Trump nuk është testuar për koronavirus, njoftoi Shtëpia e Bardhë, e kjo pasi të paktën dy ligjvënës me të cilët ai kontaktoi kohët e fundit hynë në izolim pasi morën pjesë në një konferencë me një person që rezultoi pozitiv, raportoi Reuters.
“Presidenti nuk e bëri testin Covid-19, sepse ai nuk kishte një kontakt të zgjatur të ngushtë me ndonjë pacient të konfirmuar me Covid-19, dhe as nuk kishte ndonjë simptomë. Presidenti Trump është në gjendje të shkëlqyeshme shëndetësore dhe monitorohet nga afër nga mjekët e tij,” tha zëdhënësja Stephanie Grisham.
Siç është raportuar më parë, pesë ligjvënës amerikanë kanë qenë në izolim që nga e hëna, përfshirë dy republikanë që kanë pasur kontakte me Trump që prej ekspozimit të koronavirusit.
Ligjvënësi Matt Gaetz raportoi se ai kishte pasur kontakte 11 ditë më parë me një person i cili ishte pozitiv.
“Megjithëse deputeti nuk ka simptoma, ai mbetet në shtëpi dhe ne jemi në pritje të rezultateve të testit të tij,” shkruajti ekipi i tij në Tëitter. Ai do të mbetet në izolim për 14 ditët e rekomanduara.
Një republikan tjetër, Doug Collins, i cili u takua me Donald Trump të premten, tha se ai do të qëndrojë në karantinë vullnetare edhe pse nuk kishte simptoma, pasi ishte i ekspozuar ndaj virusit në fund të shkurtit.
Collins ishte pas presidentit amerikan të premten gjatë një vizite zyrtare në Qendrën Amerikane për Kontrollin dhe Parandalimin e Sëmundjeve në Atlanta. Ai shtrëngoi duart me Trump gjatë këtij udhëtimi, sipas disa mediave. /tesheshi.com/
