Vetëm pak orë pasi Këshilli i Sigurimit i Kombeve të Bashkuara miratoi një rezolutë që i ashpërson sanksionet ndaj Koresë së Veriut në përpjekje për ta bërë atë t’u japë fund programeve bërthamore, Pheniani është përgjigjur me lëshimin e gjashtë predhave me rreze të shkurtër.
Njoftimin e ka dhënë Ministria e Mbrojtjes e Koresë së Jugut, dhe zëdhënësi i saj shpjegoi se bëhej fjalë për raketa ose për predha artilerie.
Koreja e Veriut bën rëndom prova raketore, por ato shpeshtohen kur autoritetet vendase kërkojnë ta sfidojnë bashkësinë ndërkombëtare.
Një provë bërthamore u krye në janar, e përshkruar nga Pheniani si shpërthimi i një bombe me hidrogjen. Ndërsa lëshimi i një sateliti në orbitë muajin e shkuar, me një raketë me rreze të gjatë, është parë me dyshim, si një provë për raketat balistike.
Sanksionet e vendosura dje nga OKB-ja ndaj Koresë së Veriut janë më të ashprat në dy dekada. /tesheshi.com/
